A chung berah Minerva an kir

Minerva Punjab chuan nimin tlai khan an khelmual thar Tau Devi Lal Stadium-ah Shillong Lajong 3-2 in an hneh a, Neroca zuan khumin I League hmahruaitu an ni.

Champion lai Aizawl FC erawhin Thawhlehni zanah Churchill Brothers 1-0 in an hneh lo a, nomawi chuhtu zingah an tel tawh lo. Mizo club-in result ṭha nei lo mah se I League nomawi inchuh boruak erawh a sang–Punjab club Minerva leh Neroca bakah Kolkata club East Bengal leh Mohun Bagan ten champion beiseina an la nei vek.

Vanneihna nen
Minerva Punjab hian first half-ah Guy Eric Dano (6') leh Bali Gagandeep (45+2') te hmangin hma an hruai a, Shillong Lajong-in second half-ah Daniel Odafin (60') leh Lawrence Doe (64') te hmangin an sut.

Samuel Lalmuanpuia captain-na hnuaia khel Lajong-in point hlawhchhuah inbeisei hman mah se Minerva tan Bali-a'n minute 81-naah chakna goal a khung.

Minerva hian hnehna chang turin vanneihna an mamawh a, referee Tejas Narvekar chuan Samuel-a thawhrah senga Lajong forward Abdoulaye Koffi khung chu minute 90-naah a pawmsak lo a, Ivorian forward hian Minerva keeper lakah tihsual a nei niin a lang lo.

Punjab club hian match hnih chhung chak hmel an hmu tawh lo a, point thum an hlawh chhuak a, champion turin an dinhmun a ṭha leh ber tawh.

AFC ve thung
Aizawl FC-in match nga chhung chak hmel an hmu tawh lo a, an match hnuhnung bera an hneh loh Churchill Brothers hi tun hnaia harhtharna chang an ni.

Tilak Maidan-ah Mizo club-in defender Masih Saighani hmangin goal hmahruai khungah inngai mah se referee-in a pawmsak lo, an fixture a fuh tawk loh avanga tha thona an neih loh avangin point hlawh chhuak tur khawpin an khel ṭha lo.

Minute 21-naah Mechac Koffi chuan Goan club tan goal awmchhun a khung a. Aizawl FC-in goal dang an chhuah belh loh avangin an vannei a, Mizo defender C. Lalrosanga chu minute 80-naah hnawhchhuah a ni.

Engtin zel?
Minerva hian match 13-ah point 29 an hmu tawh a, an hnuai chiaha awm Neroca-in match khata khel tamin point hnihin an la pha lo.

February 10 hian Manipur club hian Aizawl FC an mikhual dawn. Mizo club hian champion beiseina nei tlem tawh mah se season tawpah I League-a a sang pali leh Indian Super League-a a sang pali tan inelna buatsaih a ni dawn tih thawm a awm avangin ṭan chhan tur a la awm.