Mizoram Police an kal zel

66th BN Mullik Memorial All India Police Football Championship-ah Mizoram Police chuan nimin khan Assam Rifles 7-0 a hnehin quarterfinal an lut.

Vawiin chhun dar 1:00-ah Sikkim hnehtu Maharashtra nen semi final lut tur an zawng ang.

Nimina khelh last 16 -ah Mizoram Police tan Lalbiakhlua'n hattrick a siam a; F. Lalrinpuia,

V. Lalṭanpuia leh Lalfakzuala ten goal khat ṭheuh an khung a, Assam Rifles player a own goal bawk. Jammu-a inelna neih mekah Mizoram hian match li khel tawhin goal 23 an khung tawh a ni.

India ram pum huap Police inelnaah Mizoram an la champion ngai lo a, tun ṭumah hian nomawi chawi ngei tumin an feh chhuak a, an khelh chinah harsatna an la tawk lo.

Group stage-ah an khingpui Uttar Pradesh (5-0), Goa (6-0) leh Chhattisgarh (5-0) te chu an sawp vek a, knockout round-ah pawh goal sarih khungin awlsam takin an chak a, match li an khelh tawhah goal an la chhuah lo.