MFA Futsal League-ah Chanmari-in semifinal an thleng? En châkawm Ramhlun South leh Chhinga Veng

RFL Plastics MFA Futsal League-ah zanin hian semifinal lut tur team hnih a chiang dawn. Thawhlehni zan first leg-ah Chanmari-in Dinthar 8-3 zeta an sawp avangin semifinal an luh ngei a rinawm a, Ramhlun South leh Chhinga Veng te erawh 2-2 a an inhnehtawk avangin zanin inkhel boruak a sang ang.

Zanin dar 7:00 hian R. Dengṭhuama Multipurpose Hall, Mualpuiah quarterfinal second leg khelh ṭan a ni ang a, Ramhlun South leh Chhinga Veng ten bul an ṭan ang a, Dinthar leh Chanmari ten an chhunzawm ang.

Dinthar veltu Avid-a
Chanmari-in MFA Futsal League-ah result ṭha duhin player ṭha an fawm khawm a, chung zingah chuan playoff-a Dinthar goal khung khawl David Laltlansanga a tel. Chawnpui tlangval Avid-a hian a club hlui Dinthar a hmachhawn hmasak berah goal li a khung a, quarterfinal first leg-ah Chanmari hi 8-3 zeta chak puiin semifinal an thlen ngei a rinawm.

Chanmari tan hian tualchhung football-a hming chher tawh Reuben Zosangpuia, Samuel Laltlanthanga, Lalbiaknia, Lalrammuanpuia leh Lalbiaknia ten goal khat ṭheuh an khung. Dinthar tlangval pahnih Reuben-a leh Samuel-a ten an veng club lakah zahngaihna an lantir lo a, Chanmari mipui auhtirtute zinga mi an ni.

Dinthar tan K. Lalsawmtluanga'n goal hnih khungin George MS Dawngliana'n scoresheet-ah a hming a nem kai a, amaherawhchu an tlarhnung a phui loh avangin heng goal thum hi mualphona hliah khuhtu chauh a ni a, semifinal thleng tur chuan vanneihna an mamawh tawh ang.

En châkawm chu
Ramhlun South leh Chhinga Veng inkhelah chak zawk an awm lo a, first leg-ah ṭantu awm ṭha tawk lo mah se zanin erawh a hmuhnawm dawn avangin entu an tam tawh beisei a ni.

Ramhlun South tan veteran Rohmingthanga leh Lalnunmawia ten goal an khung a, MPL-a player langsar pahnih hi an goal nawrna ber a ni. Amaherawhchu, Malsawmfela hmun ruak hnawhkhat thei an awm lo a, Ramhlun South goal nawr a na tawk lo.

Chhinga Veng che rang pahnih Lalsawmzela leh C. Lalmuanpuia ten goal an khung a, first leg-ah che ṭha zawk an ni tih nemnghehna chu man of the match-ah Ramhlun South keeper Zomuankima an thlang. Entu lamah erawh Chhinga Veng hian ṭan an mamawh a, champion thei tur khawp player kawl mah se au phur tur mipui an nei tam tawk lo.