Mizoramin Khelo India final an lut : Tlai dar 3:00-ah Mizoram vs Punjab

Nimin tlai khan Mizoram mipa football team chuan Delhi 5-0 a sawpin Khelo India School Games football final an lut.

Champion lai Mizoram hian vawiin tlai dar 3:00 hian Punjab nen JN Stadium Practice Ground-ah nomawi an inchuh ang.

New Delhi-a semifinal inkhelah Mizoram tan F. Lalnuntluanga leh Lalnunzama ten goal hnih ve ve an khung a, H. Zawnhmingthanga'n goal khat a thawh bawk. Final-a an hmachhawn tur Punjab hian Thawhlehni khan Haryana 3-1 in an hneh a, Mizoram aiin ni khatin hahdamna hun an ngah zawk.

Mizoram hian league round-ah Kerala, Haryana leh West Bengal te an hneh vek. Match li an khelh tawhah goal 17 khungin an lamah goal hnih chiah a lut. Final kalkawngah Mizoramin harsatna tawk lo mah se group stage-a 2-1 a an hneh Haryana chu Punjab-in 3-1 a an hneh avangin nomawi humhim a awlsam lo ang.

Ngopa rawlthar Nuntluanga chuan match tinah goal a la khung vek a, team tana goal khung hnem ber Chanmari rawlthar Lalnunzama chuan goal riat a thun tawh.