NM Gupta Trophy : Group B hmahruaitu Mizoram
Mizoram chuan group B hmahruaitu nichungin 32nd Capt NM Gupta Trophy semifinal an lut a, vawiin tlai dar 1:30 hian group match hnuhnung berah Arunachal SS an hmachhawn ang.
Champion lai Mizoram hian NF Railway, ARC (Shillong) leh DGAR te hmachhawn tawhin an hneh vek. Vawiina an khingpui tur Arunachal SS hian an match hmasa pahnihah NF Railway leh ARC te an draw a, hmahruaitu ni thei tawh lo mah se semifinal khelh an la beisei avangin inkhel an la thutak ang.
Mizoram dinhmun
Mizoram hian hrem vangin mid-fielder Lalromawia leh forward MC Malsawmzuala te an chhawr thei dawn lo a, damlohna vangin Lalmuanzova leh K. Lalnunzama te an khelh theih a rinawm loh.
Tlarhnung lama Mizoram bang rinawm defender Lalrinchhana Tochhawng leh keeper Zothanmawia te chu mamawh dan a zira chhawr theih an ni tawh a. Inhliam chunga Silchar-a hruai tel C. Ramdinmawia chu inenkawl turin thawn haw a ni a, Armed Veng South tlangval aiah hian Bawngkawn tlangval Lalnuntluanga chu koh a ni.
Mizoram coach Lalsangzuala Hmar chuan, "Semifinal lut tawh mah ila chak vek kan duh a, chutihrualin inhliam lo turin kan fimkhur ang a, ṭul loa card hmuh a rem lo bawk," tiin an khelh dan tur hmang Vanglaini a hrilh.
Arunachal SS lam
Silchar club Arunachal SS tan Mizo player 10 aia tam an khel a, chung zingah chuan MPL-a tawnhriat nei ṭha Ramfangzauva, Rosangliana, Lalvensanga, B. Zoramthara, Lalruatpuia (Lalmama), Malsawma Chhangte leh Calvin Zosiamliana te an awm a, Mizoram B team tia sawi theih an ni.
Mizoram coach Sanga chuan, "Arunchal hi team ṭha tak an ni a, Railway nena an inhnehtawk ṭum khan an vanduai hle. Chance an hlah hnem bakah Railway khan chiang taka offside-in an si phurh an sut a, ARC nen goal awm loa an inhnehtawk ṭumin chak phu khawpin an khel ṭha bawk," tiin an khingpui team a fak.
Arunchal SS hian Mizo player bakah foreigner pahnih an kawl a, Silchar club hian NM Gupta-ah tikimtu ni ringawt loin champion an tum tih a lang.
Mizo puitu Mizo
Silchar-a Mizo awmten Mizoram team tan ṭhat an chhuah a, khualmualah pawh tlangnel takin an awm theih phah.
Mizoram coach Sanga chuan, "Silchar-a Mizote kan chunga an ṭhat avangin Mizo nih a nuam a, result ṭha
hmanga chhanlet ve hi kan bat a ni. Kan match hmasa lamah min ṭawiawm ṭha a, Arunachal SS nen pawh hian min ṭawiawm ṭhat ngei ka beisei," tiin Vanglaini a hrilh.