MSVT hnehin Khatla an tho

Mizoram Super League season linaah Khatla TBL an tlu rei lo a, match hmasa bera Zarkawt BCA an hneh loh hnuah Thawhlehni zan khan Mission Vengthlang Hollow chu 114-51 in an sawp.

Hawla Indoor Stadium-ah player nei hrawl zawk Khatla TBL-in bul ṭan ṭha nghalin MSVT-in an luh ve hauh hmain point 14 an nei thei a, first quarter-ah chak tur a chiang tawh a, quarter tina an inthlauhna chu point 10 a tling vek.

MSL-a vawi hnih champion tawh Khatla hian champion zia chhuahin tun season-a point 100 khung tling hmasa ber an ni. TBL aṭangin player 11-in point an nei a, Tuikual South aṭanga an lakluh Vanchuangpuia'n khung hnem berin point 18 a nei a, Vanlalnunsanga (17 pts), Eddie Zothanmawia (14), Lalliansanga (13), Simon Lalremruata (12) leh Zorinsanga Bawihtlung (12) te'n double digit point an nei vek bawk.

Inkhela khung hnem ber erawh point 26 neitu Ronald Zomuanpuia a ni a, Hollow guard Ronald hi match hnih a zawnin a khung hnem ber ni tawh mah se team chak puitu a la ni lo. MSVT hian February 14 zanah Tuikual South an hmachhawn ang a, Khatla TBL hian February 9-ah nomawi chhuhsaktu MSV Vikings an hmachhawn ve bawk ang.