Premier League club ten Thlasik chawlh an nei tawh dawn?
Europe-a league lian panga zingah Germany, France, Italy leh Spain ten thlasik lai, Krismas bawr velah chawlh an nei ṭhin a, England-ah erawh a ni ve lo–hemi chungchang hi sawi lan a ni fo tawh ṭhin a, thuthar berah chuan Premier League-in thlasik chawlh neih tumin hma an la mek.
England rama football thuneitu sang ber Football Association chuan Premier League-in television deal a neih mek chu kum 2019-a a tawp hma chuan thlasik chawlh neih ngawt theih a nih loh thu an lo sawi tawh–tunah erawh television deal thar atan inbiakna a kal mek a, beisei anga a kaltluang a nih chuan thlasik chawlh hi neih ngei a nih a rinawm tawh.
Thlasik chawlh tih hian tuna inbiakna anga engkim a kaltluang a nih chuan January-ah chawlh hi neih a nih a rinawm ber–Krismas boruak vuakvet laiin England-ah chuan tun hma aṭangin inkhel en tur a awm ṭhin a, he tihdan hun rei tak an lo neih tawh hi nghawng tel tir an duh lo.
TV deal chu
Premier League TV rights chungchanga inbiakna hi kar leh lamah chuan thutlukna engkim puan fel hman beisei a ni. Tun dinhmuna Premier League TV rights hlutna hi pound tluklehdingawn 5.14 vel a ni a, Sky Sports leh BT Sport chu tun dinhmuna TV rights neitu an ni.
TV rights thar tur hi 2019-20 inkar chhung atan a ni dawn a, chhut dan aṭang chuan TV rights kal lai mek ai hian 23% velin pawisa zat hi a pung tura ngaih a ni. Sky Sports leh BT Sport chuan Premier League TV rights hi chan nawn tumin hma an la mek a, Facebook leh Amazon hming sawi lan a ni bawk.
Premier League chuan, "FA leh EFL te inbiakna hun engemaw chen chu kan lo neihpui tawh a, English football calendar hahthlak tak hi tih ziaawm dan kan ngaihtuah a ni," tiin thuchhuah an siam a, Premier League TV rights neih duh tan chuan thlasik chawlh thlawp a ngai dawn.
Eng nge an sawi?
Thlasik chawlh hi hman a nih ngat chuan Premier League manager zingah lawm tur an tam hle ang–Manchester City manager Pep Guardiola chuan, "Thlasik laiin inkhel a tam lutuk a, player ten an tlin lo. Hetiang a nih chuan kan player-te hi kan ti hlum mai ang," tiin player an chauh thu a lo sawi tawh a, inhliam tam zawk pumpelh turin thlasik chawlh neih a ṭul thu a lo sawi tawh.
Manchester United manager Jose Mourinho chuan Champions League-a Premier League club ten beisei an phak loh ṭhin chhan chu chawlh an neih tlem vang niin a lo sawi tawh bawk.
Portuguese manager chuan, "February-ah Champions League khel turin kan inbuatsaih a, hemi hma thla hnih chhung hian match 20 vel kan khelh laiin German, French, Spanish leh Italian te chu chawlh hmang zo hlim, thatho takin an khel a ni," a ti a, "English team aiin an dinhmun a ṭha nghal a ni," a ti.
Krismas chu ni lo e!
Premier League manager tam tak ten thlasik chawlh an thlawp lai hian Arsenal manager Arsene Wenger erawh chuan thlasik chawlh an nei a nih pawhin Krismas-ah chuan chawlh a duh loh thu a sawi–London club hian tun Krismas vuakvetah khan ni 19 chhungin match ruk an khel.
Gunners boss chuan, "Krismas laiin kan chawl a nih chuan ka ṭap thei hial ang. Krismas laia inkhelh hi English football nihphung a ni a, hman aṭanga kan tih dan a ni. Premier League tih lar zel nan a ṭangkai em em bawk. Khawvel dang zawng zawng an chawlh lai a nih avangin mipuiin Premier League lam an hawi ṭhin a ni," a ti.
2017/18 season-ah hunpui lai an tih mai, December 18-January 4 inkarah khan match 41 zet khelh a ni a, hetih hunlai hi intihhlim nan leh chawlh hman nana English mipui ten football an hman uar lai a nih avangin thlasik chawlh hi hman a nih pawhin January thla chawhnu lamah a ni ngei ang.