FA Cup : Premier League club-in goal khung an uar
Thawhlehni zan FA Cup fourth round replay-ah Premier League club pahnih Swansea City leh Huddersfield Town an inlan a, club pahnihin goal khung an uar hle - goal 12 ngawt an khung.
Tun hnaia khel ṭha tak Swansea hian League Two club Notts County chu 8-1 ngawtin an sawp a, Huddersfield-in hun pangngaiah Birmingham City chu 1-1 in inhnehtawkpui mah se extra time-ah goal thum an khung avangin 4-1 in an sawp ve bawk.
Swansea tan Tammy Abraham leh Nathan Dyer chuan goal hnih ve ve an khung a, Indian thisen kai, Netherlands international Luciano Narsingh chuan assist 'hattrick' a nei bawk - last 16-ah Sheffield Wednesday an lenchilh ang. Huddersfield player zingah langsar bik an awm lo.
Hei le Swansea
Swansea City-in season ṭantira an tum ber chu Premier League inhamtan a ni a, mah se Paul Clement enkawlna hnuaiah beisei an phak loh avangin Welsh club hian December khan Bayern Munich assistant manager hlui hi an ban a, a hmun ruakah Carlos Carvalhal an lalut.
Besiktas boss hluiin Swansea-ah danglamna a thlen nghal a, Premier League table hnuai lam pathum zing aṭangin Swans a hruai chhuak a, match kua a enkawl tawhah vawi khat chiah a tlawmpui - heng match zingah hian Liverpool leh Arsenal laka hnehna an chan te a tel.
Swans-in an league match hnuhnung bera Leicester City nen an inhnehtawk ṭum aṭanga player pasarih an thlak danglam chungin harsatna an nei lo a, Abraham leh Dyer ten an goal hmasa pali an khung hnuah Kyle Naughton, Wayne Routledge, Tom Carroll leh Daniel James ten goal khat ṭheuh an khung ve leh - James tan Swansea tana a match hmasa ber a ni.
FA Cup aia League
Swansea-in FA Cup-ah League Two club hmachhawn turin an player neih ṭhat ber ber an thawhchhuahpui lo a, Notts County tan a danglam bik lo.
Bolton Wanderers midfielder hlui Kevin Nolan enkawlna hnuaia khel club hian League Two-ah pathumna dinhmun an luah mek a, season thara League One inpetkai turin dinhmun ṭha takah an awm mek.
Notts County neitu Alan Hardy-a'n FA Cup-ah last 16 an luh chuan £750,000 an hlawh theih thu sawi mah se Nolan chuan, "8-1 a chak em chu an phu lo a, mah se an finishing tam zawk kha chu Premier League standard a ni. Kan tana pawimawh berah rilru kan sen a ngai a, chu chu league a ni. Lawm taka he 'tlawmna' hi pawm mai tur kan ni," tiin league lamah an rilru an pek lehnghal tur thu a sawi.
Huddersfield hmaah United
Huddersfield Town-in 4-1 in Birmingham an sawp a, last 16-a an hmachhawn tur chu Manchester United a ni. Birmingham khelmuala inkhelah hian Championship club tan Che Adams chuan goal hmahruai khung mah se Marc Roberts chuan an lamah ti lutin Town si phurh a sut sak.
Minute 90 thleng goal dang a luh loh avangin extra time khelh a ni a, Huddersfield tak tak an inlar thung - Steve Mounie leh Rajiv van La Parra ten minute li chhung leka goal hnih an khung hnuah Tom Ince chuan goal khat a thawh ve leh a, Huddersfield an chak.
Huddersfield-in last 16-ah United an hmachhawn dawn avangin quarterfinal luh a harsa dawn tih a chiang a, Huddersfield coach David Wagner erawhin Red Devils an hmachhawn tur chu a hlim thu sawiin, "Kan khelmualah United kan hmachhawn leh dawn avangin ka hlim a, Huddersfield khaw pumpui an hlim ang, " tiin a sawi.