Jeje-a'n penalty a pet goal lo

Thawhlehni zan Indian Super League inkhelah Mizo tlang­val Jeje Lalpekhlua'n Chen­naiyin FC tan penalty a pet goal lo a, an mikhual Bengaluru FC lakah 3-1 in an tlawm.

Chennai khawpuia in­khel­ah mikhual team an tlangnel hma a, Boithang Haokip chuan minute hnihna lekah Bangalore club tan goal hmahruai a khung. Chennaiyin-in minute 33-naah an si phurh sutna goal Francisco Fernandes hmangin an sut a, Jerry Lalrinzuala siamsak a ni.

Minute 63-naah Bangalore club bawkin Miku hmangin goal an khung leh a, minute 71-naah Chennaiyin captain Henrique Sereno chu hnawhchhuah zui a nih bawk avangin Albert Roca nauten hnehna an chang ngei dawn niin a lang.

Mahse, minute 75-naah Chennai club hi beiseina pek an ni a, BFC defender Harmanjot Khabra chuan penalty box-ah Dhanpal Ganesh a tih tluk avangin penalty a chawi - a pet turin Jeje a lo pen chhuak a, mahse Hnahthial tlangval hian a pet ṭhat tawk loh avangin India tana a khelhpui Gurpreet Singh-a'n a dan sak.

Hun pek belh minute lina­ah Sunil Chhetri-a'n goal khat khung lehin Chennai club beiseina a tih tawp sak a, table chung berah an awm chhunzawm zel.