Paris St-Germain tan Di Maria hattrick

Paris St-Germain chuan winger Angel di Maria goal thum hmangin Ligue 2 club Sochaux chu 4-1 in an hneh a, a zawna a vawi li nan French Cup champion nih an tumna an chhawm nung zel.

Thawhlehni zan last 16 inkhelah PSG tan Di Maria hian minute khatna lekah Kylian Mbappe-a cross a tauh lut a, mual neitu Sochaux lamin Florian Martin hmangin an sut.

Neymar inlan loh zanah PSG lamin goal khung kawngah harsatna an tawk chuang lo, striker Edinson Cavani chuan an goal hnih­na khungin; Argentina internatonal Di Maria-a'n kum 2010 hnua a vawi khat nan hattrick a siam zui bawk.

PSG goalkeeper Kevin Trapp chu minute 90-naah hnawh chhuah a ni a, defender Dani Alves chuan hun tawp dawnah goal a veng a ni.

Paris Saint-Germain coach Unai Emery chuan, "Kan tum ber chu hnehna chan kha a ni a, hliam nei loa hnehna kan chang thei kha ka lawm hle. Match kan ngah chho dawn a, a bik takin Champions League khelh a hnaih tawh avangin player hliam neih loh a pawimawh hle a ni," tiin a sawi.

Last 16 inkhel dangah Marseille chuan Bourg-en-Bresse 9-0 in an sawp. Fulham striker hlui Kostas Mitroglou leh Lucas Ocampos ten goal thum ve ve an khung bakah Luiz Gustavo, Dimitri Payet leh Clinton N'Jie ten goal khat ṭheuh an khung bawk - Marseille hian kum 70 chhunga an chak chian ber ṭum an tawng.