NBA champion Milwaukee Bucks
Milwaukee Bucks chuan kum 50 chhung an nghah hnuah NBA title an hlawh chhuak ve leh ta. Giannis Antetokounmpo-a point 50 neih hmangin Bucks hian Phoenix Suns chu 105-98 in an hneh.
Nimin zing NBA Finals game 6 inkhelah Bucks an chak leh tak avangin best-of-seven series chu 4-2 in an la, game 7 khelh ngai loin an champion - kum 1971 hnua a vawi khat nan basketball inelna sang berah hlawhtlinna an chang ve leh chiah.
A tawpa hnehtu
NBA Finals khelh ṭan dawnah khan Giannis Antetokounmpo hi a hliam a, 100% fit chungin inelna a hmachhawn zui thei ang em tih a chiang lo; Phoenix Suns mualah game hmasa pahnih khelh niin Bucks hi ṭum hnih an tlawm nghal, series-ah 2-0 in an hniam.
Beisei aia hmain Giannis a inkhel leh thei, an mual hman thiam Fiserv Forum-ah mikhual an thleng ve thung, ṭum hnih an chak ve phawt; team pahnih 2-2 in an inhnehtawk a, chak zawk tur a chiang ta lo - game hnuhnung ber thleng tur Suns chu buk rit zawk an la ni.
Bucks tan Suns muala hnehna chan a pawimawh a, game 5 kha Talking Stick Resort Arena-ah khelh niin, 123-119 in an luh chhuah, game khat chauh chak hmabak an nei ta, anmahni mualah ngei champion nemngheh theihna remchang an nei ta.
NBA Finals-ah hian game hmasa pahnih hoh tan hnehna chan let leh hi thil harsa tak a ni. Mahse, Bucks hian thil harsa chu an thlentir ta miau si, basket-ball inelna sang berah hian hetianga tho chhuak thei hi team panga chiah an la awm.
An phur asin
Fiserv Forum-ah mipui 20,000 an ṭhu khat vek a, kawtthlerah mipui 65,000 chuang an pungkhawm bawk - an tual zawlah ngei NBA champion nih beiseia kalkhawm an ni, an duh ang chhanna an hmu bawk - an lawmna chu tui angin a liam ngei ang.
Inkhel tir phat aṭangin Bucks an chungnung, quarter hmasa berah 29-16 in hma an hruai thei. Mahse, quarter pahnihnaah Suns lamin point 31 an neih belh laiin Bucks lamin point 13 bak an neih belh theih lo, thil a chiang ta lo.
Team pahnih an inkhel tawk, point nga vel bawr bakin an inthlau ngai meuh lo. Inkhel chawhnu lamah Giannis-a ropuina a langsar, Greek tlangval hian point 50 a neih zinga 32 chu second half bika a neih niin, hun pawimawh laiah a che fuh.
Quarter hnuhnung ber thlengin Suns lamin beiseina an nei. Amaherawhchu, Giannis bakah point 17 neitu Khris Middleton a hmuhnawm a, ani hian an khingpui lamin an nawr letna tam tak a lo chhu chat ṭhin.
Player hlu ber Giannis Antetokounmpo
'Giannis, Giannis, Giannis' tiin Fiserv Forum, Milwaukee-a inkhel entute an au rual ṭhup ṭhup reng a, court chhunga a chet vel dan chu amah ṭantute tan hmuhnawm ropui a nih laiin, an khingpui tan erawh anchhia mai a ni thung.
Greek tlangval, 6ft 11in zeta sang Giannis Antetokounmpo hian basket an mamawh laiin an nei thei zel, point 50 a neih bakah rebound vawi 14 a la, an khingpui lamin basket an neih tur ṭum nga ngawt a dansak lai te chuan entu mipui thawm a ring thei hle.
NBA Finals 2021 bikah Giannis hian match thum ngawt chu point 40 leh rebound vawi 10 lak tlinna inkhel a nei a, team a champion pui bakah mimal chawimawina NBA Finals MVP leh NBA defensive player of the year award a hum haw.
Tun hmain Michael Jordan leh Hakeem Olajuwon te chuan season khat chhungin NBA Finals MVP leh NBA defensive player of the year chawimawina hi an lo dawng tawh, player ropui bik pahnih sulhnu hi Antetokounmpo-a'n a rawn zui ve chiah.
Kum 26 mi Antetokounmpo chuan, "Ka laka rinna nghat ngamtu Milwaukee chungah ka lawm. A ṭha thei ang bera ka khelh theih nan ka ṭhianten min pui, an chunga ka lawmna hi thua sawifiah sen pawh a ni lo hial ang," tiin a sawi.
Bucks coach Mike Budenholzer chuan, "Giannis hi mihring danglam bik a ni a, player ṭha a ni satliah lo a, court chhungah hruaitu ropui a ni bawk. Ani bakah hian player dang zawng zawng pawhin champion duhna rilru an nei, an thawhrim rah chu an hmu," tiin a sawi ve bawk.
