Vawiin aṭangin Olympic mipa football

Olympic mipa football-ah footballer langsar an tel dawn avangin en a châkawm a, vawiin aṭangin Japan-ah khelh ṭan a ni dawn.

Vawiin hian team zawng zawng an inlan nghal dawn. Tlai dar 5:00-ah Brazil leh Germany te an inkhel dawn a, 2016 Rio de Janeiro final rematch hi a hmuhnawm ang. Brazil hi champion lai an ni a, tun ṭumah pawh hian champion rinkai an ni pha.

Spain an ṭha
Spain hian Barcelona 1992-ah gold medal an la a, kum 2000 khan silver medal an la leh. La Roja hian khawvel football thununin FIFA World Cup leh Euro C'ship nomawi te chawi mah se Olympic-ah hian kum 1992 hnuah gold medal an la leh lo.

Tun ṭumah hian Spain-in champion ngei tumin si ruk lain an thawk chhuakah a ngaih theih theih. Euro 2020-a Luis Enrique hoa semifinal khel pha zinga mi Barcelona rawlthar duhawm Pedri leh Athletic Bilbao goalkeeper Unai Simon bakah player dang pali Eric Garcia, Pau Torres, Dani Olmo leh Mikel Oyarzabal te an tel.

Player dang Real Madrid duo Dani Ceballos leh Marco Asensio bakah Real Sociedad midfielder Mikel Merino ten European football-ah hming an chher viau tawh bawk. Spain hian tlai 1:00-ah Egypt an hmachhawn ang.

En châkawm dang
France-in kum 35 mi André-Pierre Gignac hoin an khel dawn a, Brazil captain hi kum 38 mi Bracelona player hlui Dani Alves a ni bawk.

Japan tan Barcelona academy aṭanga inzir leh Real Madrid player ni lai Takefusa Kubo a tel a, kum 20 mi winger Kubo hi Getafe-ah loan-in a khel mek.

Ivory Coast lamin Manchester United player Eric Bailly leh Amad Diallo bakah Milan midfielder ṭha Franck Kessié te an kawl a, zuam ngawt chi an ni lo ang.