Brisbane-in Olympic 2032 thleng dawn

International Olympic Committee (IOC) chuan kum 2032 Olympic thlengtu tur chu Brisbane an nih thu an puang a, Australia-in Olympic a thlen vawi thumna tur a ni dawn a ni.

Australia hian kum 1956 khan Olympic hmasa ber chu an lo thleng tawh a, Melbourne khawpuiin a thleng - kum 2000 khan Sydney khawpui chuan hlawhtling takin a lo thleng tawh bawk.

Brisbane-in inelna an thleng dawn tih puan a nih hian Brisbane palaite chuan IOC session-ah an lawmzia lantirin kut an beng a, Brisbane khawpuia mipui pungkhawm chuan halmawite halin an lawm hial a ni.

IOC president Thomas Bach chuan, "International Olympic Committee chuan Olympic 2032 thleng tur chu Brisbane khawpui an nih thu lawm takin a puang a ni," a ti.

Brisbane khawpui awmna Queensland state chuan kum 2018 khan Commonwealth Games a lo thleng tawh a, infiamna hmun ṭha tak tak an neih sa avang te, an ruahmanna ṭha tak avang te, infiamna khawmpui lian an lo thlen tawh avang te leh a khawpui boruak nuam tak avang tein duhsak a hlawh sa.

Australia prime minister Scott Morrison chuan, "Brisbane leh Queensland tan mai ni lo, kan ram pumpui tan ni chhinchhiah tlak tak a ni," tiin a sawi.

Kum 2019 khan IOC chuan Olympic thlen tum inchuhna kawnga sum sen tam ṭhin lutuk tih tlem nan Olympic thlen dil dan a tidanglam a, a hma ang khan official candidate khawpuiten vote thlak hmain campaign an nei thei tawh lo.

Dan thar hnuaia Olympic thleng hmasa ber tur Brisbane hi IOC executive board chuan inlungrual takin inelna thleng tur hian an thlang - dollar tluklehdingawn 17 vel chu Olympic an thlen vangin Brisbane hian economic hlawkna awm thei turah an ngai.

Olympic 2032 thleng tur hian Indonesia, China, Doha(Qatar), Budapest (Hungary) leh Ruhr region (Germany) te chuan an duhna an lo lantir tawh a, mahse, Brisbane thlan a ni ta a ni.

Olympic 2024 chu Paris (France) in an thleng dawn a, Olympic 2028 chu Los Angeles (USA) in a thleng thung ang.