Indian player thiam ber Jhingan

All India Football Federation (AIFF) chuan AIFF awards an puang a, chawimawina ngaihhlut hlawh ber, AIFF Men's Footballer of the Year 2021 chawimawina chu defender Sandesh Jhingan hnenah hlan a ni.

AIFF Men’s Emerging Footballer of the Year chawimawina chu Manipur rawlthar Suresh Singh Wangjam kutah hlan a ni a, award pahnih dawng tur hi Indian Super League leh I League club coach-ten vote hmangin an thlang.

Kum 28 mi Jhingan chuan, "ISL leh I League coach tena an thlanchuah ka nih avangin he award hi ka ngaihlu hle. He chawimawina hi ti ṭha lehzual tura min fuihtu atan ka hmang a, he infiamna hi midangin khelh ve an châk theihna tura fuih phurtu ka nih theihna tur atana hman ka tum ang.

"AIFF, ka chhung te, club leh national team a ka khelhpui leh coaching staff-te ka chunga rinna innghah tlat zel avangin lawmthu ka hrilh che u a, engtiklai pawha ka lama ṭang tlat ṭhinte hnenah lawmthu ka sawi a ni. He award hian ken tel lian tak a nei a, chu chu midang beiseina tih thlawn loh a ni," a ti.

India tana vawi 40 inlan tawh Jhingan hian season hmasa kha ATK Mohun Bagan tan a khel a, ISL final an luhna kawngah player pawimawh a ni - nikum khan India sorkar chuan infiammite chawimawina sang Arjuna Award a hlan bawk.

Kum 20 mi Suresh Wangjam hi Under 17 World Cup 2017-ah khan India squad-ah a tel a, Indian Arrows tan season hnih a khelh hnuah kum 2019 khan Benglauru a zawm.

Bangalore club tan hian season hman zawh takah khan league match 19 khelin player pawimawh a ni phak a, March 25 khan India senior team tana a match hmasa ber khelin Blue Tigers tan hian match nga a khel tling der tawh.

Manipur rawlthar Suresh chuan, "AIFF emerging player award dawn hi ka tan chuan chawimawina ropui tak a ni a, he award hian inrintawkna min pek belhin ka hma huna hlawhtlinna tam zawk chang turin min fuih phur dawn a ni," a ti.

AIFF chawimawina sang pahnih hi Mizo footballer zingah Jeje Lalpekhlua chuan a lo dawng ve ve tawh a, Hnahthial tlangval hian 2013 khan Emerging award hi dawngin kum 2016 khan AIFF Player of the Year a lo ni tawh bawk.

Hmeichhe award lamah Scottish club Rangers forward Bala Devi chu AIFF Women’s Footballer of the Year atan thlan a ni a, kum 31 mi striker hian January 2020 khan Rangers chu thla 18 atan a zawm a ni.

AIFF Women’s Emerging Footballer of the Year chawimawina chu Manisha Kalyan hnenah hlan a ni thung a, kum 19 mi midfielder hian Gokulam Kerala tan khelin 2019-20 khan Indian Women's League-ah a champion pui.

Best Referee chawi-mawina chu Tejas Nagvenkar hnenah hlan a ni a, Sumanta Dutta chuan Best Assistant Referee award a dawng thung.