Sri Lanka-ah India-in series an la

India-in ODI match thum khel turin Sri Lanka an pan a, Men in Blue hian nimin khan Lions hi wicket thumin an hneh. Match thum khelh tura vawi hnih chak India-in series an la chiang tawh a, July 23, Zirtawpni tlai dar 3:00-ah match thumna hi khelh tur a ni.

R. Premadasa Stadium-a inkhelah hian Deepak Chahar-a'n wicket hnih (53/2) a lak bakah thi loin 69 run a siam a, player of the match-ah an thlang. ODI khelh zawh hian India leh Sri Lanka te hian T20 match thum an khel leh ang.

Inkhel chu
Ṭhumvawrah Sri Lanka an vannei a, vuak hmasak an thlang. Lions opener Avishkha Fernando-a'n half century (50) a siam a, a kawppui Minod Bhanuka-a'n 36 run siam bawkin bul an ṭan ṭha. India bowler pahnih Bhuvneswar Kumar (54/3) leh Yuzvendra Chahal (50/3) ten Sri Lanka run siam tam tur an dang.

Amaherawhchu Charith Asalanka (65), Chamika Karunaratne (44*) leh Dhananjaya de Silva te an chet ṭhat avangin Sri Lanka hian over 50-ah 275/9 run an siam a, target ṭha pangngaiah a ngaih theih.

India top order Prithvi Shaw (13), Shikhar Dhawan (29) leh Ishan Kishan (1) ten bul an ṭan ṭha lo a, Manish Pandey (37) leh Suryakumar Yadav (53) te hmangin chak beiseina erawh an nei ve zel.

Hun harsa aṭanga India chakpui turin wicket hnih latu Deepak Chahar a rawn pen chhuak a, 69 run a rawn siam a, ball nga chiah a awm tawh tihin Men in Blue-in 277/7 run an siam a, an chak hram.

Eng nge an sawi?
India captain Shikhar Dhawan chuan, "Bul kan ṭan ṭha lo a, kum naupang zawk tan inzirna tur ṭha tak a ni. Kan bowler-te chet ṭhat zar kan zo a, Sri Lanka run siam tam tur an chelh thei a, kan khingpuiten game plan an siam ṭha bawk. A tawpah erawh a vannei zawk kan ni a, ka lawm hle," tiin a sawi.

Sri Lanka captain Dasun Shanaka chuan, "Inkhelh harsa tak a ni a, ka naute an khel ṭha. Indian player-te an che ṭha a, a bik takin Deepak Chahar a che ṭha em a ni," tiin chak lo mah se an khelh danah a lungawi thu a sawi.

Man of the match Deepak Chahar chuan, "Khua a lum a, a tir lamah ball thlauh kan nei a, a pawi. Chutihrualin run 275-ah kan titawp thei a, batting lamah chuan mumang ang mai a ni a, a tawp thlenga dam hi a hlu. Rahul Dravid-a'n ka bat lai a hmu tawh a, chuvangin Bhuvneshwar Kumar aia ka luh hmana chhan kha niin ka hria," tiin a sawi.

Kum 28 mi Deepak Chahar hi Uttar Pradesh lam mi a ni a, September 25, 2018 khan India tan ODI-ah khel ṭanin Afghanistan a hmachhawn a, ram aiawhin match nga chauh a la khel a ni.