Joshua vs Usyk inhnek hun tur a chiang

British boxer rothap Anthony Joshua inhnek hun tur tihchian a ni ta a, September 25 khian Oleksandr Usyk nen Tottenham Hotspur Stadium-ah an inhnek dawn.

Kum 31 mi Joshua hi Tyson Fury nen inhnek turin thui tak ruahmanna kalpui a ni tawh a, mahse, Deontay Wilder a inrawlh avangin boxer pahnih an inhnek thei lo a, court lamin Fury hi Wilder hmachhawn leh phawt turin a ti.

Hetiang a nih takah chuan Joshua pawh WBO lam chuan Usyk hmachhawn turin thu an pe a, British boxer hian IBF, WBA leh WBO heavyweight kawnghren a kawl lai chu Usyk lakah hian hum a tum ang.

Kum 34 mi Usyk hian heavyweight-ah title fight a la nei ngai lo a, mahse, cruiserweight-ah erawh major title tia an sawi WBA (Super), WBC, IBF leh WBO kawnghren a lo hreng vek tawh thung.

Joshua chuan, "Olympic gold medallist ve ve, kan hmaa dingte tlanchhiat san tum ngai lo ve ve kan ni. Kan inhnekna tur hmun a ṭha a, mipui thawm pawh a ṭha khawp ang.

"Hetiang ang stadium ropui taka fight hmasa ber ka ni tur hi ka lawm takzet a, engkim peih fel a ni tawh a, fight hmachhawn turin ka inpeih tawh a ni," a ti.

Ukrainian boxer Usyk hian London 2012 Olympic-ah khan heavyweight-ah inhnek hmachhawnin gold medal a la a, khami ṭum vek khan super-heavyweight ah Joshua inlanin gold a la ve bawk.

Joshua hian vawi 25 fight-a hmachhawnah vawi 24 hnehna a chang thei a, June 2019-a Andy Ruiz Jr-a'n a barakhaih tih loh kha chu tlawm a la nei lo.

Usyk hian vawi 18 fight-a hmachhawn tawhah hnehna a chang vek a, heng zinga vawi 13-ah hian a khingpui a knockout thei a ni.

Boxer pahnih inhnekna tur Tottenham Hotspur Stadium-ah hian mi 60,000 an leng a, chutihrual chuan an inhnek hunah meuh hi chuan UK sorkarin mi 20,000 aia tam lenna stadium-ah chuan vaccine la tawh chin chauh kal phalna dan a siam hman mai thei - an ngaihtuah mek.

Joshua leh Usyk inhnek lai hian Fury chuan Wilder a hmachhawn dawn thung a, a vawi thum nana boxer pahnih inhnek hun tur erawh October 9-ah sawn a ni thung.

Fury leh Wilder hi July 24-a inhnek tura ruahmanna kalpui zet a ni a, mahse, Fury-a'n Covid-19 a kai avangin an inhnek hun tur hi October 9 atan sawn a ni ta a ni.