Brentford-in Onyeka an lalut

Premier League kai thar Brentford chuan English top flight a kai hnua a hmasa ber turin Nigerian midfielder Frank Onyeka an lalut a, a man zat tarlan a ni lo.

Danish club ṭha FC Midtjylland aṭanga an lakluh midfielder hian kum nga chhung atan contract a ziak a, squad a zawm hmain a inkhunghrang rih leh phawt dawn a ni.

Bees (Brentford sawina) boss Thomas Frank chuan, "Kan squad tichak thei tura kan beisei a ni a, player ṭha tak a nih avangin thawhpui kan châk tawh hle a ni. Danish league aṭanga lokal niin a khelhna league-ah hian midfielder ṭha ber pawl a ni thei a, hmasawn zel turin theihna a neiah kan ngai a ni," a ti.

Nigeria tana vawi khat inlan tawh Onyeka hian season hmasa khan Midtjylland tan inelna hrang hrangah match 41 khelin goal li a khung a, assist vawi li a nei bawk - Champions League khelin Liverpool an hmachhawnna inkhelah khan a inlan ve ve.

Kum 74 hnuah top flight league khel turin Brentford an kir a, an club neitu sumdawng hausa Matthew Benham hi FC Midtjylland-a share ngah ber a ni bawk.