Gazidis-a hrawk a cancer

AC Milan chief executive Ivan Gazidis chu a hrawk a cancer tih hmuhchhuah a ni. Italian club chuan an hotupa chungchang hi an sawi chiang tawh a, a dam leh theih ngei an beisei thu an sawi bawk.

Kum 56 mi Gazidis hian a hna pangngai hi a chelh chhunzawm dawn, a bik taka ruahmanna siamsak niin a natna hi enkawl a ni bawk ang - a hna tibuai loa an enkawl theih an beisei tihna a ni.

Arsenal chief exe-cutive pawh lo ni tawh Gazidis chuan, "Damdawi lam thiam ṭha tawk ka nei, an thurawn ang chuan ka natna hi a dam pumhlum leh theih ngei kan beisei. Thawhpui ṭha tak tak ka nei bawk a, an zarah hna pawh ka chhunzawm thei ang," a ti.

North London club chhuahsanin Gazidis hian 2018 December thla khan Milan tan hna a thawk. Italian club hi an kalphung a thlak nual a, hun rei tak hnuah Champions League khel turin an tling leh a ni.