Celtic an chak zo lo

Scottish club Celtic-in coach thar Ange Postecoglou hnuaiah bul ṭan thar tum viau mah se an beisei ang result an hmu nghal thei lo a, Champions League qualifying second round match-ah FC Midtjylland chu 1-1 in an inhnehtawkpui.

Celtic tan hian a club thar tana a match hmasa berah Liel Abada chuan minute 39-naah goal hmahruai a khung a, Israel international hian July 14 khan Israeli Premier League club Maccabi Petah Tikva aṭangin Celtic hi a zawm.

Mahse, minute 44-naa Nir Bitton hnawhchhuah a nih hnuah tlem zawk ni chungin Celtic an khel a, a tlem zawk an nih chhung erawh a rei lo - Danish winger Anders Dreyer chu minute 56-naah hnawhchhuah a ni ve leh a, player 10 ve vein an khel.

Midtjylland an hnual phah lo - minute 66-naah Evander chuan freekick hmangin si phurh a sut a, hun tawp thlenga goal dang lut loin team pahnih an ṭin.

Team pahnih inkhelh-na hi Celtic mual ni mah se away goal rule hman a nih tawh dawn loh avangin Celtic an lawm viauin a rinawm a, July 28 zanah third round luh inchuhin an inkhel leh ang.