Khelo India football champion Mizoram
India prime minister Narendra Modi-a'n khawvel huapa India infiammite lan theihna turin sum tam tham tak sengin Khelo India a duang chhuak a, ram pum huapa inelna ngaihven hlawh takah hian Mizoram chu football inelnaah an champion.
Nimin khan JLN Stadium Complex, Delhi-ah final khelh a ni a, Mizoram hian Lalnunzama, F. Lalnuntluanga leh Zawnhmingthanga te goal hmangin Punjab chu 3-2 in an hneh. Tun inelnaa goal kua khungtu Chanmari FC forward Zama chu best player atan thlan a ni.
Mizo naupang huaisen
Mizoram hian Zama hmangin minute 24-naah hmahruai mah se, Punjab hian minute nga hnuah Rohit Sheikh hmangin an sut nghal.
Second half-ah MPL6 Under 18 best forward F. Lalnuntluanga (47') leh H. Zawnhmingthana (51') ten Mizoram tan goal khungin champion turin an dinhmun ṭha hle.
Amaherawhchu Zama'n yellow card pahnih hmuin minute 77-naah hnawhchhuah a ni. Mizoramin an thiampuipa an chan a, player 10-a an khelh avangin Punjab-in beiseina an neih phah.
Minute 81-naah Sukwinder Singh-a'n goal khungin Mizoram dinhmun a him tawh lo a; amaherawhchu Mizo naupangten Punjab laka tun hnaia Mizoram record ṭha lo siam ṭha turin huaisen takin a tawp thlengin an khel a, nomawi an sual chhuak.
Punjab chungah
Mizoramin National Games 2015 gold medal la turin Punjab chu final-ah an hneh a, amaherawhchu hemi kum vek hian Santosh Trophy semfinal-ah Punjab hian Mizoram hi penalty shootout hmangin an hneh let.
Junior National Football Championship - BC Roy Trophy final-ah Punjab hian tun hnaiah a kum zawnin Mizoram an hneh. Tunah erawh Khelo India hmangin Mizo naupangin phuba an la a, Punjab chungah Mizoram an awm leh ta.
Khelo India-ah Mizoramin result an nei ṭha a, nikum khan final-ah West Bengal hnehin Chennai-ah nomawi an chawi tawh a, kum zawnin an champion tihna a ni.
Inelna changtlung
Mizoram manager Lalrengpuia chuan, "Khelo India hi khawvel dang elpha tura inelna buatsaih a nih avangin a changtlung a, a ṭhat tawk lohna hmuh tur chu awm bawk mah se National Games pawhin a tluk lo ang," tiin inelna buatsaih dan fel fai tak chu a fak.
Renga chuan, "MSSC leh MFA te min buaipui danah lawmna tur hlir a ni. India ram pum huap inelnaah ka champion a, player leh coaching staff-te'n an theihna zawng an chhuah a, Mizoram tan a ni," tiin Vanglaini a hrilh.
Mizoram coach HC Zarzoliana fakin Renga chuan, "First half kan khel ṭha lo a, halftime-ah coach Zara'n player a fuih ṭha a, second half kan ṭan ṭhat kha final-a kan chak theihna a ni. Thla khat chhung inbuatsaihna ṭha tak kan nei a, team ṭha tak kan nei a, position tinah chak lohna kan neih loh avangin champion kan phuin ka hria," tiin a sawi.
Champion kalkawng
Group Stage
Mizoram 5 - 0 Kerala
MIZ : Lalnunzama 31', 39', 46', 74',
F Lalnuntluanga 61'
Haryana 1 - 2 Mizoram
MIZ : F. Lalnuntluanga 51', 84'
Mizoram 5 - 1 West Bengal
MIZ : Lalnunzama 30', 76';
Flavius Lalruatkima 34' (P);
HP Lalremruata 64';
F. Lalnuntluanga 71'.
Semifinal
Mizoram 5 - 0 Delhi
MIZ : F. Lalnuntluanga 3', 55';
H. Zawnhmingthanga 31';
Lalnunzama 50', 75'
Mizoram 3 - 2 Punjab
MIZ : Lalnunzama 23';
F. Lalnuntluanga 46';
Zawnhmingthanga 50'
Mizoram Team
1. C. Vanlalhriata
2. Flavius Lalruatkima
3. Lalmuankima
4. F. Malsawmzuala
5. Lalrampanmawia
6. David Lalnunfela
7. Laldinpuia Pachuaa
8. F. Lalnuntluanga
9. Malsawmdawngliana
10. Lalrinzuala
11. Vansangliana
12. Vanlalhriata
13. C. Alex Lalramsanga
14. Emmanuel Lalrindika
15. Lalnunzama
16. Lalruatfela
17. H. Zawnhmingthanga
18. HP Lalremruata
Manager Lalrengpuia
Coach HC Zarzoliana