Mapuia Cricket League ; Zaninah player lilam an ni dawn

Mizorama cricket inelna ngaih-hlut leh sum tamna ber Mapuia Cricket League chu March 1 hian khelh ṭan a ni dawn a, zaninah player lilamna neih a ni dawn. LPS Studio, Zarkawt-a player lilamna neih tur hi zan dar 8:00-ah ṭan tur a ni dawn a, LPS 1-ah live-in a en theih ang.

MCL khelh turah hian 1st Division-a top four chin Chanmarians, Chhinga Veng, Kulikawn leh Ramhlun Venglai te chu tling chiang sa an ni a, inelna hming put chhan Mapuia khelh ṭhinna Zarkawt Lords chu tling sa an ni bawk. Tling chiang sa team panga hian an player neihsa aṭangin player 10 chiah an kawl chhunzawm thei a, a bak zawng hi release-in lilamnaah dah an ni.

Player te hi category 1, 2 leh 3-ah ṭhen hran an ni a, category 1-a awmte hi an base price tur chu Rs 5,000 niin player 14 an awm a, category 2 hi Rs 3,000-ah player man inṭanin player 17 an awm a, category 3-ah Rs 2,000-a man inṭanin player 38 an awm.

Team paruk inelna tur a nih avangin hmun ruak pakhat la awm hi lilamna neih a ni dawn a, Rs 20,000 aṭanga chhan ṭan tur a ni. Vanglaini thudawn danin nimin thleng khan hmunruak awm chuh turin team pathumin dilna an thehlut tawh a, zaninah a chhang huai berin MCL an khel ang. Team auction hi player lilamna hmaa neih hmasak tur a ni ang.

Hmun ruak awm changtu team hian club dangin an duh player an chhuah hmain an player duh pahnih chu base price-in an lei thei dawn a ni.