Zaninah final rematch Khatla Vs Mission Veng
Mission Veng Vikings-in Mizoram Super League season linaah champion nomawi humhim an tum a, Tuikual South leh Republic VR4 an hneh tawh. Zanin dar 7:30 hian Hawla Indoor Stadium-ah MSV hian anni aia buk rit zawk Khatla TBL an hmachhawn dawn a, Vikings tan MSL3 final rematch hi fiahna hautak a ni ang.
Vikings an tlo
Mission Veng Vikings hian Nilai zan khan kai thar Republic VR4 chu 70-56 in an hneh a, champon zia neiin an khelh ṭhat loh zanah hnehna an chang.
Vikings hian quarter hnihnaah point riat chiah an lut a, third quarter-ah pawh VR4 aiin an khung tlem zawk. Quarter tawp berah hian Republic hian point li lain champion lai laka hmahruai lai pawh an nei a, amaherawhchu tawnhriat player ngah zawk Vikings an danglam.
Mamawh hunah tak Vanlalnunpuia'n 3-pts a lut a, Moses Zoremmawia'n (11 pts) quarter hnih chhung point nei tawh lo mah se quarter tawp berah Vikings fal nan 'cool' takin 3-pts a khung a, Michael F. Lalawmpuia (15 pts) leh Serpents aṭanga an lakluh Robert Lalfakzuala (15 pts) te an chet ṭhat avangin hun tawp meuh chuan team pahnih inthlauhna chu point 14 hial a tling.
Semifinal an thleng?
Vikings hian team paruk awmna MSL-ah vawi hnih an chak tawh avangin semifinal an hnaih a, table mawngphaha awm MSVT Hollow an la hmachhawn dawn bawk avangin American player Ronald March-a rawn inlan hun pawh knockout stage chinah chauh a nih a rinawm a, Khatla TBL nen pawh a inlan lo ang.
Mission Veng coach H. Lalhruaitluanga chuan, "Khatla TBL hi an ṭha a, keini pawh kan ṭha a ni. Chak tur sawi lawk theih a ni lo a, eng result pawh nei ila Mizo hlangin semifinal kan thlen theih ngei kan ring," tiin March-a chah luh an la tum rih loh thu a sawi.
Phuba lak hun
Khalta TBL-in season thumnaah a lungthu kim nan MSL-ah champion tum mah se an ṭhenawm Mission Vengin an dal sak a, zanin hi phuba lakna hun remchang a ni.
TBL hian an player thar Vanchuangpuia leh Lalliansanga te an ṭhatpui a, zanin hian Hollow BBSP aṭanga an lakluh Vanlalṭhazuala an chhawr thei tawh dawn.
Ṭhazuala hian inkhel tidanglam thei tur khawpa thiamna a nei a, khelhna hun an pe a nih chuan jersey number 1 a ha dawn a, inkhel entur tan he number hi chhinchhiah chi a ni.
Khatla player tharte an ṭha a, an player awmsa pawh an ṭha, season thum chhung final lut vek thei an ni a, kuminah pawh champion rinkai an ni.
TBL manager Ramdingliana chuan, "Kan coach leh player pawimawh Mapuia hi India team a enkawl avangin league round-ah kan chhawr thei dawn lo a, a tel lo hi chu a chang chuan kan tuar deuh chuan ka hria. Chutihrualin kan khelh fuh zanah chuan kan ṭha a, Vikings nen pawh hian tawnhriat kan ngah zawk pawhin ka hria a, chak tur erawh sawi lawk theih a ni lo," tiin Vanglaini a hrilh.