Futsal League a hmuhnawm dawn

RFL Plastics MFA Futsal League semifinal khel tur zanin hian a chiang dawn a, R. Dengṭhuama Stadium-ah inkhel hmuhnawm thlir tur a awm ang.

Zan dar 7:00-ah Electric Veng leh Durtlang te an inkhel ang a, quarterfinal first leg-ah 3-3 in an inhnehtawk. Darkar khat leh a chanve hnuah Saron Veng leh Armed Veng South ten quarterfinal match hnuhnung ber an khel ang a, first leg-ah Saron hi 4-2 a an chak avangin semifinal turin an dinhmun a ṭha tawh hle.

Intum tawk
Durtlang leh Electric Veng te an intluk tawk a, first leg-ah goal ruk zet lutin team pahnih inkhel hi a hmuhnawm ber ang hiala sawi theih a ni.

Second leg hi a chak zawk hriat hun a ni a, chak zawk an awm lo a nih phei chuan penalty shootout thlengin a beisei theih ang. Durtlang tan Lalhruaizela, Lalfelkima, Lalchungnunga leh Isaac Malsawmtluanga ten hmun pawimawh an chang zel a, captain Lalruatfela khelh ṭhat leh ṭhat loah a danglam thei bawk.

Electric Veng tan Shillong Lajong tan pawha lo khel tawh Jacob Lalrawngbawla chu boruak sangah danglamna thlentu a la ni zel a; tun inelnaa goal li khung tawh pahnih VL Hmuchhuaka leh Lalramnghaka te an ṭangkai bawk ang.

Saron an ṭha
Saron Veng tan Lalremtluanga leh K. Lalhmangaihkima te an vul zel a, first leg-a goal hnih ve ve khungtute hian tun inelnaah goal 14 leh goal 9 an khung tawh.

Armed Veng South lamin chak an duh a nih chuan Hmangaihkima an dan thiam a ṭul dawn a, AVS hian an player ṭha an chan nual avangin semifinal lut turin game plan ṭha zawk an neih a ṭul ang.