Tottenham an chak awlsam

Tottenham Hotspur chuan FA Cup last 16 lut turin Nilaini zan khan League Two club Newport County chu 2-0 in an hneh a, Premier League club hian fifth round-ah League One club Rochdale an hmachhawn ang.

Wembley Stadium-a fourth round replay-ah Newport defender Dan Butler chuan minute 26-naah an lamah a tilut a, Spurs tan kawng harsa a awm tawh lo. Minute riat hnuah Erik Lamela chuan mualneitu tan goal hnihna a khung a, Mauricio Pochettino hote 2-0 in an chak.

Lamela hian inhliam vanga hun rei tak a inkhelh theih loh avangin tun ṭum hi September 2016 hnua Spurs tana a goal khung lehna hmasa ber a ni a, ni 504 hnuah goal a khung leh chauh tihna a ni.

Derby thlirin
Spurs-in February 10, In­rinni zan hian Arsenal an mikhual dawn a, Pochettino pawhin North London Derby thlir chungin Newport County an khelh ṭum hian player a rem.

Argentine manager hian Liverpool nena inhnehtawk ṭuma starting eleven aṭangin player 10 a thlak a; Lamela, Moussa Sissoko, Fernando Llorente leh Son Heung-min te an khelh avangin League Two club hneh turin an ṭha tawk.

Tottenham-in first half-ah goal hnih an khung avangin chak turin harsat an nei lo a, Spurs second keeper Michel Vorm pawhin hna a nei lo. Newport hian vawi khat chiah goal zawnah an pet a, hun tawp hma hretin Padraig Amond-a'n keeper Vorm-a zawnah tak a pet.

London club hian PSG aṭanga an lakluh Lucas Moura an la chhawr lo a, hei hi a chhan chu FA Cup fourth round-a inziahluh hun siamah an la lakluh fel loh vang a ni. Brazilian winger Moura hi Arsenal nena an in­hma­chhawn hun aṭangin a chhawr theih ang.

Eng nge an sawi?
Tottenham manager Mauri­cio Pochettino chuan, "Kan player tam zawkin khelhna hun an nei thei a, kan chak bawk avangin a lawmawm hle a ni," tiin a sawi a, FA Cup-ah engpawh a thlen theih thu a sawi.

Newport manager Michael Flynn chuan, "Kan chak loh avangin kan lawm lo a, chutihrualin ka player-te thawhrimna avangin ka lawm. Tottenham-in player ṭha an nei a, anni ang hneh tur chuan vanneihna kan mamawh a ni," tiin an inthlauh thu a sawi.

FA Cup last 16 hi February 16-19 hian khelh a ni ang.