Vawiin tlai atangin Winter Games
Khawvel ram hrang 92 aṭanga infiammi 2,952 inelna tur 2018 Winter Olympic chu vawiin tlai dar 4:30 hian a hawnna neih tur a ni dawn a, inelna hi South Korea thlen tur niin Pyeongchang Olympic Stadium, Pyeongchang-ah Opening Ceremony hi neih tur a ni, he hunah hian Korean hnam zia chi hrang hrang phochhuah a ni ang.
International Olympic Committee (IOC) chuan, "A hawnna hunah chuan a thlengtu ram ṭawnga a hmasak dan indawtin ram hrang hrang an inlan dawn a, a kharna hunah erawh chuan ram zawng zawngte chu a huhoin an kal thung ang," tiin thuchhuah an siam. Melbourne Olympic closing ceremony angin kuminah hian an ti leh dawn tihna a ni.
Hman leh tun
Kumin Winter Games Opening Ceremony hian kum dang aiin ngaihven a hlawh. Korea ram pahnih South Korea leh North Korea te chu hnam puanzar pakhat 'unification flag' hnuaiah an kalho dawn; ram pahnihte hian kum 70 chuang politics boruak duhawm lo tak an neih tawh siamṭhat an duh vanga hetiang thil hi ti an ni.
Kum 1956 Summer Olympics kha Australia khawpui Melbourne-ah nghah a ni a, a khar ni hian mipa football match khelh niin, Soviet Union chuan si khat faiin Yugoslavia an hneh. Ruahman lawk dan chuan ṭum dang ang bawkin ram hrang hrangte chu an hnam puanzar hnuaiah rawn kal chhuak leh tura tih a ni.
Mahse, kharna hun hman a nih hma lawk hian Olympic Games organising committee chairman Sir Wilfred Kent Hughes chuan ruahmanna thar a siam thut, mipui 102,000 hmaah infiammite chu a huho in an rawn kal chhuak a, kharna hun hlawhtling leh hriat reng tawh tur an hmang–kuminah an ti ve leh chiah dawn.
Khaw vawt hnuaiah
Korean Meteorological Administration chuan Nilaini khan news conference an nei a, thlirlawk dan chuan opening ceremony neih laia khaw vawh lam chu -2C emaw -5C emaw vel ni tura an ngaih thu an sawi. Pyeongchang-ah chuan February thla hi kum khat chhunga boruak ro lai ber a ni tel bawk.
Thlasik lai a ni a, inelna neihna tur hmun Korea pawh hi thlasik natna hmun tak a ni. Zanah chuan khaw vawh zawng hi a tlangpui thuin -10C te a ni ṭhin a, Winter Olympic vawh ber ṭum an tawng tura ngaih a ni. Kum 1994 khan Lillehammer, Norway-ah nghah a ni a, hemi ṭuma khaw vawh zawng chu -11C a ni a, a vawh ber ṭum a ni.
Inrinni khan opening ceremony rehearsal neih a ni a, vur a sur bakah thli a thawt nasat avangin khaw vawh zawng chu -23C teh meuhah a tla hniam. Vur sur a nasat a, thli a thaw nasa leh a nih chuan Norway rama khawvawt hi chiang takin an khum ngeiin a rinawm hle.
Stadium chu
A hawnna leh a kharna neihna tur hmun Pyeongchang Olympic Stadium hi mipui 35,000 ṭhut lenna a ni a, tun ṭum Olympic pual atan hian pound maktaduai 44.1 senga sak a ni a, awlsam zawka sak zawh a nih theih nan a chung khuhna siam a ni lo!
Nikum December thla khan he stadium-ah hian concert buatsaih a ni a, mipui kalkhawmte chu khawvawt vangin an buai hle. Hetiang thil a thlen leh theih avangin hian a thlengtu lam hian he huna kal turte chu, mahni intuam lum ṭha turin an chah a, vur sur hnuaia awm theih nan raincoat a pawimawh thu an sawi bawk.
Winter Olympic hnuhnung ber khan Russia khawpui pakhat Sochi-ah nghah a ni a, khaw lum lai chuan 20C te a hlawh phak–London Summer Olympic lai aiin a chang chuan a lum zawk tihna a ni, kumin nen chuan a boruak a dang hle dawn a ni.