Referee-in club lian an hlau - Chennai coach

Thawhlehni zan I League inkhelah Mohun Bagan leh Chennai City chu goal khung loin an inhnehtawk a, referee thutluknaa lungawi lo Chennai boss V. Soundararajan chuan, "Referee te hian club lian an hlau a ni," tiin a lungawi lo hle.

Chennai City khelmuala inkhelah hian Bagan-in minute 81-naah penalty an hlawh chhuak a, referee thutluknaah Chennai City an lungawi lo hle–referee Akash Jackson Routh-a'n penalty a pek chhan hi yellow card hmu tawh sa Tarik Akhand vang a ni a, mah se Akhand hi haiin Edwin Vanspaul zawk yellow card hi a pe.

Penalty pet turin Akram Moghrabi a lo pen chhuak a, mah se Lebanon international pet hi Chennai keeper Kabir Thaufiq chuan a dan sak–Edwin bawk a vanduai nawn, penalty aṭanga ball kal zel petchhuah a tumna lamah a lakah Bagan player foul mah se Tamil midfielder zawk hi yellow card pek nawn a ni a, hnawhchhuah a ni.

Chennai player-ten hei hi hrethiam loin referee lakah an lungawi lohna an lantir a, Mohun Bagan official ṭhenkhat an chet uchuak avangin technical area aṭanga hnawhchhuah an ni bawk–inkhel hi hun engemaw chen tih tawp a ngai hial a, hun pek belh minute 12 khelh a ngaih phah.

South Indian club coach Soundararajan chuan, "Referee-in thutlukna dik lo tak a siam a, thil chiang lo a tam em em. Kan penalty chawi kha penalty tur a ni lo a, Edwin-a'n yellow card a hmuh phah bawk. Referee te hian club lian Mohun Bagan leh East Bengal te hi chu an hlau bik a ni. Thutlukna tam zawk kha chu a dik lo," tiin a lawm lo hle.

Tamil Nadu coach hlui chuan sawi zawmin, "Referee ten tihsual an neih ṭhin avangin tunah hian relegation zone-ah kan awm mek. Khelmualah khan player 11 nei ila chu inkhel result a danglam mai thei asin. Tun hi tihsual nei lo chunga match thum player 10-a inkhel kan kharna a ni ta," a ti a, inkhel ṭantir lamah penalty ngei tur pek an nih loh thu a sawi bawk.