Neroca hmaah Aizawl FC

Vawiin tlai dar 2:00 hian Neroca-in Khuman Lampak Main Stadium-ah Aizawl FC an mikhual dawn.

Manipur club hian champion beiseina an la neih laiin Mizo club erawh league match nga chhung an chak tawh loh avangin champion aiin relegate an hnaih tawh zawk.

An inkalsan
Neroca hian I League second division champion-in I League khel turin an tling a, Aizawl FC erawh I League champion lai an ni. Mizo club hian RG Stadium, Mualpuia Neroca an mikhual ṭum pawhin champion nawn beiseina la nei mah se Kareem Omolaja hmanga an goal khung an hum zo lo a, goal hnih an chhuah avangin point an hlawh chhuak lo a, hnung tawlh lam an pan bawk.

AFC hian league match nga chhung hneh an nei tawh lo a, Neroca pawhin Mizo club an hneh hnuah Shillong Lajong leh Minerva hneh lo zawn mah se match hnuhnung pahnihah an chak a, champion theihna kawng a la inhawng.

Manipur club hian Aizawl FC hi an tlansan a, an inkar tizim turin Mizo club tan vawiin inkhel hi a pawimawh ang.

Tlarhnung buaina
Neroca nena inhliam Nigerian defender Kareem Omolaja a la dam lo a, Chennai City nen Lalhriatrenga (Achia) a inhliam zui a, Churchill nena hnawhchhuah C. Lalrosanga chu hrem vangin a la inlan thei dawn lo.

Defence laia chhawr zinga dam awm chhun Masih Saighani lah Afghan mi a nih avangin Manipur-a lut turin Protected Area Permit (PAP) a mamawh. AFC lamin an he dan hi an hriat lawk loh avangin Masih hian buaina a tawk a, nimin thleng khan Guwahati-ah la awmin a inlan dawn nge dawn lo tih a la chiang lo.

A harsa dawn
Aizawl FC coach Paulo Meneses chuan,"Tlarhnunga kan player hman ṭhin te an inhliam avangin kan buai a, zep rual a ni lo. Chutih rualin kan harsatna chhan tur erawh kan khingpui ṭhat vang a ni dawn a, Neroca hi team ṭha tak an ni a, an muala result ṭha neih hi a har dawn a ni," tiin a sawi.

Mizo club hian defence laia chhawr theih turin Hmingthanmawia (Valpuia) an hmang thei ang a, Afghan defender a inlan theih loh chuan Portuguese coach Meneses-a'n damchiang loin Achia pawh a luhtir a ṭul ang. AFC hian goal khung lamah pawh harsatna an nei a, match 12 an khelhah goal 12 khungin match liah goal an khung lo.

Pressure a awm
Neroca coach Gift Raikhan chuan, "Tuna kan awmna dinhmun avang hian pressure chu a awm a, mipuiin champion an duh a, keini pawhin kan duh. Amaherawhchu, he pressure vang hian kan thawkrim sawt a, chak ngei kan tum a ni," tiin Mizo club hneh ngei an tum thu a sawi.

Manipur club hian hnehna an chang a nih chuan Minerva aia match hniha khel tamin hmahruaitu an ni rih thei ang.