Wembley-ah Arsenal lut dawn

"Wembley Stadium chuan i duh ang tak football i khelh theihna turin hmun nuam a chhawp chhuah sak ang che," tiin Arsene Wenger chuan England ram chhunga stadium hmingthang chungchang a sawi, mipui 90,000 lenna stadium-ah hian zanin dar 6:00-ah Arsenal leh Tottenham Hotspur ten Premier League match an khel dawn.

Nikum April thla khan White Hart Lane-ah Tottenham hian Arsenal hi si hnih faiin an hneh a, kum 1995 hnua a vawi khat nan Gunners chunga awm chungin season an khar theihna chhan pakhat a ni a; Wenger-a nau ten Champions League an khelh phak loh phah bawk–season kal laiah pawh North London club pahnihte hi palina inchuh lai an nih avangin a boruak a nung hle dawn tih a chiang.

Wembley
Tottenham khelmual White Hart Lane siamṭhat mek a nih avangin Mauricio Pochettino nauten home match khelh nan Wembley an hmang. He khelmualah hian Spurs leh Arsenal te hi tun hmain vawi hnih an intawng tawh, an intawn hmasak ber chu 1991 kha niin Spurs hian 3-1 in hnehna an chang a, kum hnih hnuah Gunners hian si khat faiin hnehna an chang let ve leh.

Season tir lamah Spurs hian Wembley hi an hmangthiam tawk lo deuh, mahse mahni khelmual hmangthiam ṭhin Pochettino leh a naute an insiamṭha tawh; an league match hnuhnung pahnihah Everton (4-0) leh Manchester United (2-0) te an hneh thei–inrintawkna an nei sang hle ang.

Arsene Wenger-a naute tan pawh Wembley hi hmun nuam a ni. Kum 2014, 2015 leh 2017 FA Cup final an khelhna hmunah hian hnehna an chang vek, an khelmual Emirates Stadium ang bawkin an hmangthiam niin a lang.

Gunners an phur
Arsenal-in Pierre-Emerick Aubameyang leh Henrikh Mkhitaryan an neih belh bakah Mesut Ozil-a'n contract thar a ziak a, Gunners hmatawng pathumte hian kartawp khan a vawi khat nan khel hoin Everton 5-1 in an sawp. Wenger chuan, "Player tharte hian phurna min siamsak a ni," a ti.

Premier League-a parukna nilai Gunners manager Wenger chuan, "Inkhel pawimawh tak a ni dawn, a hniam zawk kan la nih avangin kan inkar tih zim theihna hun ṭha a ni. Kan tan chuan chhiarkawp dana result ṭha neih chhoh ai chuan boruak nuam leh ṭha tak hnuaia khelh theih a ṭha a ni," tiin point lia an phak loh Spurs hneh a pawimawh thu a sawi.

Arsenal hian goal an khung thei tih chu hriatsa a ni a, chutih rualin an tlarhnung a phui tawk lo. Everton laka goal nga an khung ṭum pawhin goalkeeper Petr Cech-a'n hna a ngah tho. Cech hi hliam vangin a dinhmun a chiang lo, Wenger chuan, "Cech hi 100%-in a fit a nih loh chuan kan chhawr lui lo ang," a ti.

Kane hlau ru
Kum 24 mi Kane-a'n tun season Premier League match 25 a khelh aṭangin goal 22 a khung tawh a, inelna hrang hrangah goal 31 a khung tling leh der tawh–England international striker hi Arsenal tlarhnung paldarh turin a ṭha tawk.

Arsene Wenger-a'n, "A goal khung zat hi en rawh a, tun dinhmunah chuan Europe-a striker ṭha ber a ni," tiin Kane chungchang an zawhna a chhang a, North London derby vawi sarih a khelh aṭanga goal ruk khung thei Kane hi enbik hlawh a ni leh dawn.

Tottenham hian Nilaini zan khan Newport County hnehin FA Cup fifth round an lut a, League Two club an hmachhawn ṭum hian Poch-a'n a player ṭha a chawlhtir nual, zaninah erawh an ṭhat dan berin an inlan ang.