Chanmari leh Chhinga Vengin futsal league-ah semifinal thleng

RFL Plastics MFA Futsal League-ah MPL-a champion tawh Chanmari leh Chhinga Veng ten Dinthar leh Ramhlun South hnehin semifinal an lut. Final khel tur zawnna hi R. Dengṭhuama Stadium-ah February 13 leh 16-ah khelh a ni ang.

Chhinga Veng an ṭha
Ningani zan inkhelah Chhinga Vengin champion an duh tih lantirin minute 20 chhungin goal thum an khung nghal a, Malsawmfela awm lohna Ramhlun South tan thawh-chhuah a harsa tawh. Minute 50 a ral chuan chak phu zawk Chhinga Veng 6-3 in an chak a, first leg nena belhkhawmin an chakna zat chu 9-6 a ni.

Chhinga Veng FC chuan MFA hnuaia inelna MFA Super Cup, I Day Football, Mizoram Premier League leh MPL Under18-ah nomawi an chawi a, futsal inelnaah an champion leh a nih chuan season khat chhunga MFA hnuaia inelnaah an champion vek dawn tihna a ni. Semifinal-ah Chhinga Veng hian an ṭhenawm Armed Veng South leh Saron Veng te chak zawk an hmachhawn ang.

Dinthar an huaisen
Dintharin first leg-ah Chanmari 8-3 in hneh lo mah se second leg-ah entu an la ngah zawk a, thawm pawh an nei ring zawk. Khelmualah erawh squad chhah zawk Chanmari an che ṭha zawkin an goal bawh na mah se, Dinthar keeper man of the match ni zui ta RS Lallawmzuala'n goal thum bak chhuah a tum lo a, George MS Dawngliana'n second leg-a an tlawm nawn loh nan hattrick siam bawk.

Inkhel pahnih belh-khawmin Chanmari hian 11-6 in hnehna an chang a, Chanmari mipuiin Lammuala an tih tawh ṭhin angin 'Dinthar Bye Bye' tiin an khingpui an thlah liam!

Chanmari hian semifinal-ah Durtlang leh Electric Veng chak zawk an hmachhawn ang.