Zarkawt BCA-in Tuikual South an hneh

Mizoram Super League season linaah Zarkawt BCA-in Khatla TBL an hneh hnuah Ningani zan khan Hawla Indoor Stadium-ah Tuikual South chu 85-72 in an hneh.

A bul leh tawp
Tuikual South-in F. Zodinthara leh Lalnunpuia Renthlei (R-a) te hmangin bul an ṭan ṭha a, first quarter-ah 19-14 in hma an hruai. Amaherawhchu, player nei ṭha zawk BCA-in quarter pahnih dang an thunun a, third quarter a zawhin Zarkawt hian 65-44 in hma an hruai tawh.

Quarter tawp berah R-a (22 pts) leh Vanlalrinchhana (14 pts) telna TKS rawn che ṭha nawn mah se BCA-in dinhmun an sawhnghet tawh a, Serpents aṭanga an lakluh Lalsangkima hoin inpawhthlaktir an tum lo a, Zarkawt hian 85-72 in hnehna an chang.

Lalrina telna
Zarkawt BCA-in Mission Veng champion ṭuma Mizo zinga langsar ber Lalrina Renthlei (16 pts) an lalut a, Tuikhuahtlang tlangval hian MSL-a la champion ngai lo club hi a ti ṭha sawt.

Season tina champion rinkai ni ve ziah BCA tan Dennis Lalmuanpuia (27 pts), Zonunsanga (10 pts) leh Henry Lalramngaihawma (9 pts) te an khel ṭha a, Zarkawt club hian league round-ah an khingpui an hneh vek a nih pawhin a mak lo ang.

BCA hian match hnih chauh la khel a, an theihna thlirin semifinal an khel dawn tih a chiang a, chhiarkawp dan chiahin a dal tawh. TKS pawh hian chak la nei lo mah se semifinal an khelh ngei a rinawm bawk.