Mizoram hnehtu Punjab Police

66th BN Mullik Memorial All India Police Football Championship-ah Mizoram Police-in bung thar an kai thei lo a, nimin khan semifinal-ah Punjab Police chu 2-0 in an hneh lo.

Jammu-a inelna neih mekah Mizoram Police-in vawiin hian SSB nen pathumna an zawng ang. Mizoram hi pathumna vawi thum an ni tawh a, hnehna an chan theih chuan a vawi lina tur a ni.

SSB hi semifinal hmasa zawkah BSF-in goal khatin an hneh a; Pathianni hian final khelh tur niin BSF leh Punjab Police te an inhmachhawn ang.

Police Meet-ah Police-a hna nghet nei tawh chauh a tel theih a, hei vang hian MPL semifinal an thlen theihna tura player pawimawh player - Lalhmunmawia, Lalbiakhlua, F. Zosangliana leh C. Zomuanpuia te an chhawr thei lo a, an squad a chhah ṭha tawk lo.

Mizoram Police hian semifinal thleng turin Uttar Pradesh (5-0), Goa (6-0), Chhattisgarh (5-0) leh Maharashtra (2-1) hneh mah se, final khel tur zawnnaah an squad chhah tawk lohna a lang.

All India Police Football Championship-ah Mizoramin final an la lut ngai lo a, chenna ngai lo rama inhlangkai turin an la nghah a ṭul dawn.

Mizoram manager B. Lalneihsanga chuan, "Kan chanchin min ngaihven a, min lo ṭantu zawng zawng chungah lawmthu kan sawi," tiin Vanglaini a hrilh.