Mizoram hmaah ASEB

32nd Captain NM Gupta Trophy semifinal chu naktuk hian SM Dev Stadium, Silchar-ah khelh a ni dawn. Chawhnu dar 1:00-ah Army Green leh ARC te an inkhel ang a, dar 4:00-ah Mizoram leh ASEB te an inkhel ang.

A la ngai
Nikum khan Mizoram leh ASEB hi semifinal-ah an inhmachhawn a, hun pangngaiah goal lut loin penalty shootout-ah Lalsangzuala Hmar hote 3-0 in an chak hram. Semifinal pakhat zawkah pawh Army Green leh ARC te tho an inkhel a, Army Green hian hnehna an chang.

Kuminah hian nikum lama knockout stage lut team pali bawk semifinal-ah an intawng leh a, amaherawchu inelna thar a nih bakah player an dan tawh avangin chak tur erawh a chiang lo.

Fixture ṭha
SM Dev Stadium chauh hman a nih avangin fixture fuh a pawimawh a, Mizoram hian Ninganiah group match hnuhnung ber an khelh tawh laiin an khingpui tur ASEB chuan vawiin hian match hnuhnung ber an khel dawn chauh.

Mizoram coach Lalsangzuala Hmar chuan, "ASEB leh Army Green te goal awm loin an inhnehtawk a, team ṭha ve ve an ni. Kan vanneihna chu hahchawlhna hun kan ngah hi a ni a, tuna kan player inhliam ṭhenkhat pawh hi an dam hman kan beisei a ni," tiin Vanglaini a hrilh a, defender Lalrinchhana leh keeper Zothanmawia te an khelh hman ngei a beiseiawm tihna a ni.

Nikum khan Mizoram hian Silchar-a inelna hi Santosh Trophy inpuahchah nan an hmang tawh a, nomawi an chawi. Kuminah pawh Santosh Trophy final round an luh hnuah NM Gupta Trophy hi hmachhawn leh a, tun ṭumah erawh I League, All India Police Meet leh Police recruitment avangin player koh tur an ngah lo a, nomawi lak nawn a harsa sawt ang.