Number 1 upa ber tur Roger Federer?

Roger Federer chuan kar leha khelh tur Rotterdam Open-ah a inlan tur thu a tichiang a, kum 36 mi Federer hian semifinal a thleng thei a nih chuan Rafael Nadal khumin world number 1 a ni dawn a, hetiang dinhmun luah thei upa ber a ni bawk ang.

Grand Slam vawi 20 champion tawh Federer hi tun dinhmunah chuan Nadal aiin a ranking point 155-in a hniam zawk a, ATP World Tour 500 series zinga pakhatah hian semifinal a lut a nih chuan point 180 a hmuh belh dawn a ni.

Swiss star hian January thla tawp khan Marin Cilic hnehin Aus­tralian Open nomawi a chawi a, hard court inelna lian a hmachhawn zawh hnua a tournament hmasa leh ber tur a ni ang.

World number 2 Federer chuan, "Kum 1999 khan Rot­ter­dam Open hi ka khel tawh a, tennis inelna sang ka khelh hmasak berna hmun a nih avangin ka tan a hlu hle. Kuminah a kum 45-na an lawm dawn chiah a, hetiang huna ka inlan thei tur hi ka lawm hle," a ti.

Vawi hnih champion tawh Federer tan Rotterdam Open no­mawi chawi leh a awlsam dawn lo, kuminah hian player langsar dang Stan Wawrinka, world number 4 Grigor Dimitrov, Alexander Zverev leh champion lai Jo-Wilfried Tsonga te pawh an inlan dawn a ni.