Russian athlete dilna an hnawl
Court of Arbitration for Sport chuan Russian athletes 47 leh coach ten Winter Olympics-a inlan an dilna chu a hnawl sak rih.
Russian infiammite hian International Olympic Committee chuan dik lo takin a hnawl niin an inhria a, hei vang hian infiamna lama thubuai ngaihtuahtu sang ber CAS hnenah an thubuai ngaihtuah nawn turin ngenna an siam.
Mahse, infiammi 169 tling tawhte bak chu South Korea-ah an kal belh tawh lo. Russian athlete inlan tur pawh hi neutral flag hnuaiah independent athlete ang vekin an inlan dawn a ni.
Nimin tlai khan Winter Olympics vawi 23-na hi Pyeongchang Olympic Stadium-ah a hawnna neih a ni a, ni 17 awh tur he infiamna khawmpui lianah hian infiamna chi hrang hrang aṭangin medal 102 dawn theih tur a awm dawn a, infiammi 3,000 an kal tawh a ni.