Copa del Rey : Coutinho-a'n final-ah Barca a hruai thleng
Philippe Coutinho chuan Ningani zan khan Barcelona tana a goal hmasa ber khungin Valencia lakah 2-0 in Catalan club hi hnehna a chanpui a, Copa del Rey final an lut.
Barcelona tan Ivan Rakitic chuan goal khat dang a khung ve bawk a; Nou Camp-ah 1-0 a hnehna an lo chan tawh bawk avangin Barca hian inkhel pahnih belhkhawmah 3-0 in hnehna an chang.
Catalan club hian final-ah Sevilla an hmachhawn dawn a, season thum chhunga vawi hnih final an luhna a ni. Kum 2016 final-ah Barcelona hi an ngam lo tawh a, Barca hian 2014 final-a Real an ngam loh hnuah season thum chhung a zawnin nomawi an chawi tawh thung.
Hei le 142!
Coutinho-a'n pound maktaduai 142-in Barcelona a pan a, Liverpool playmaker hluiin a man a phu lo tia sawitu te ngawihtirin an awm ṭan - Brazilian midfielder hian Barca a pan hnuah match nga khel tawhin heng zingah hian vawi khat chiah inkhel bul a ṭan a, Ningani zanah pawh hian minute 45-naah luhtir a ni ve chauh.
Brazil international hian khelmualah minute li chauh hun a hmang hman tihin goal hi a khung nghal a, Liverpool tana a lo khelhpui tawh Luis Suarez siamsak a ni - Barcelona lamah pawh an la in 'man' reng.
Coutinho chuan, "Ka tan chuan ni hlimawm tak a ni. Barca tana ka goal hmasa ber ka khung hun tur hi nghakhlel takin ka thlir reng a, tunah chuan ka khung ta. Mahse, chung zawng zawng aia pawimawh ber chu final-a ka team ka hruai thleng hi a ni," a ti.
Chak phu Barca?
La Liga-a pathumna Valencia-in Barcelona lakah chance ṭha vawi hnih an nei - striker Rodrigo chuan 0-0 a nih laiin crossbar a tauh per a, Jose Luis Gaya chuan a hun neih ṭhatah Barca keeper Jasper Cillessen a paltlang lo bawk. Valencia-in Barca rum ṭhaih chang an nei chungin Catalan club boss Ernesto Valverde erawhin chak an phu thu a sawi.
Barca coach chuan, "Kan intawn hmasakah khan goal khung tamna chance min siam lo a, zaninah erawh chance an nei nual chungin inkhel kan thunun zawk a, chak kan phu a ni," a ti a, Rodrigo-a crossbar tauh per chu lut se chuan inkhel result erawh a danglam theih thu a sawi thung.
Valencia khelmuala Barca chak zanah Yerry Mina chuan Catalan club tana a match hmasa ber a khel bawk a, kum 23 mi defender hi thlasik transfer lai khan Barcelona hian pound maktaduai 10.4-in Palmeiras aṭangin an lei.
Hmabak chu
Pathianni zanah Barcelona-in league match an khel lehnghal dawn a, zan dar 8:45-ah Getafe an mikhual ang. Barca hian La Liga lamah pawh hma an hruai mek a, anmahni hnaih bertu Atletico Madrid aiin point kuain an sang zawk. Atletico hi zanin dar 8:45-ah an inlan ve thung dawn a, Malaga an lenchilh dawn.
Atletico hnuai chiahah Valencia an awm a, pahnihna leh pathumna inthlauhna pawh hi a sang hle - Valencia hian point kuain Atletico hi an phak lo a, Pathianni zan dar 1:15-ah Levante an mikhual dawn. Spanish Cup final luh an beiseina a tawp takah chuan season thara Champions League khelh phak tumin an inbuatsaih ang.
Real Madrid-in hmahruaitu Barcelona chu point 19 zeta an phak loh avangin champion ai chuan season thara Champions League khelh phak leh phak loh chu an buaina tur zawk niin a lang tawh - zanin dar 1:15-ah Real Sociedad an mikhual dawn a, Zidane-a naute hi palina ni mekin an hnuaia awm Villarreal aia an sanna hi point hnih chauh a nih avangin an dinhmun a him lo.