Rahul 'The Wall' Dravid a naute tan a ding

2018 Under-19 Cricket World Cup khelh zawh taka India champion puitu coach Rahul Dravid chuan pawisa an dawn dan chungchangah a dawng tam bik chu ṭha a tih loh thu a sawi.

India-in U19 World Cup nomawi an chawi khan Board of Control for Cricket in India (BCCI) chuan coaching staff leh player-te hnena sum an sem tur zat an puang a, Dravid hi dawng tam ber tura tih niin nuai 50 dawng tura tih a ni.

Hei tak hi Indian legend hian duh loin sum chu in ang veka sem ni se a duh thu a sawi–Dravid-a'n nuai 50 a dawn dawn lai hian player-te chu nuai 30 lawmman pek an ni dawn a, fielding coach Abhay Sharma leh bowling coach Paras Mhambrey ten nuai 20 ve ve an dawng ang.

Dravid a ṭawngkam
India tan bang rinawm tak a nih ṭhin avanga 'The Wall' tih hminglem an pek Rahul Dravid chuan, "Ka chanchin hi duh aiin an ngaihven nia hriat chang ka nei a, nuam lo ka ti fo ṭhin. Mimal hming tu mah sawi ka tum lo a, mah se ka thawhpuite nen hian thawhrim dawng in ang tlang vekin India tan theihtawp kan chhuah vek a ni," a ti.

Men in Blue tana ODI match 344 a khelh aṭanga run 10,889 chuang vaw chhuak thei batsman hian lawmman an dawn chungchanga a ngaihdan hi BCCI hnenah a thlen nia sawi a ni a, Indian cricket thuneitu lam aṭang erawhin thuthar a la awm rih lo.

IPL club ṭhenkhatin an sawm chunga Indian junior leh A team enkawl thlangtu Dravid hian kum khatah nuai 400 chuang a hlawh mek a, kum 2017-ah khan India hi enkawl ṭanin a contract hi kum thum chhung atan a ni.

World Cup thlirletna
Kum 45 mi Dravid enkawlna hnuaiah India U19-in World Cup an thunun hneh hle–Group B-ah Australia, Zimbabwe leh Papua New Guinea te nen awm hoin hnehna an chang vek. India hian hnehna an chang vek a ni mai lo, team hautak ber tura ngaih Australia hi run 100-in an sawp a, New Guinea leh Zimbabwe chu wicket 10 ve vein an sawp bawk.

India-in group hmahruaitu nichungin Super League quarterfinal an lut a, Bangladesh chu run 131-in an sawp. Super League semifinal-ah pawh India-in boruak sang hnuaiah ṭha takin an khel a, hmelma kumhlun Pakistan chu run 203 ngawtin an sawp!

Final-ah pawh India an buai chuang lo–group stage-a an sawp tawh hnu Australia an hmachhawn a, wicket riat ngawtin an sawp nawn–a tawi zawnga sawi chuan India hian awlsam takin U19 World Cup nomawi an chawi a, anmahni khing phatu an hmu meuh lo. India hi vawi li champion tawhin champion ngun ber an ni bawk.

Player langsar
Inelna neih zawhah World Cup-a che ṭha zual thlang chhuakin 'World Cup Team' thlan a ni a, he team-ah hian Indian player panga ngawt an tel–world team-ah hian captain Prithvi Shaw (261 runs), player of the final Manjot Kalra (252 runs) leh player of the tournament Shubman Gill (372 runs) te chu batsman-ah telh an ni.

Bowling lamah World Cup chhunga wicket la hnem ber left-arm spinner Anukul Roy (14 wickets) leh fast bowler Kamlesh Nagarkoti (9 wickets) te an lang–India aṭanga man of the series-a thlan Shubman Gill hi January khan IPL auction-ah a tel a, Kolkata Knight Riders chuan vaibelchhe 1.8-in an lei.

ICC U-19 Cricket World Cup team hi mi panga awmna selection panel-in an thlan an ni a, West Indies fast bowler hlui Ian Bishop, India women captain hlui Anjum Chopra, New Zealand captain ṭhin Jeff Crowe, journalist Shashank Kishore leh Australia all-rounder hriat hlawh ṭhin Tom Moody te an awm.