Puel-a'n Mahrez inngaihtuah turin ti

Leicester City manager Claude Puel chuan a player pawimawh Riyad Mahrez chu a ngaihtuahna seng ṭha a, squad zawm leh turin a ngen.

Kum 26 mi forward hi January transfer lai khan Manchester City chuan lei tumin an dawr a, Foxes lamin an phal lo. City hian pound maktaduai 60 chiah an phal laiin Foxes lamin pound maktaduai 95 lai an chhiar thung.

Algeria international hi club-in a transfer chungchang an kalpui danah a lungawi lo a, tun thlengin training a la zawm duh lo. Puel chuan, "Khelmuala hna hautak kan neih hlen zel tur chuan player leh club kan inlungrual a ṭul a, Mahrez hian a ngaihtuahna seng ṭhain squad rawn zawm leh se ka duh takzet a ni," a ti.

Mahrez hian January 2014 khan French club Le Havre aṭangin Leicester hi £400,000-in a zawm a, top flight football match 127 a khelh sak tawhah goal 35 khungin assist 24 a nei tawh a, Premier League 2016-a an champion ṭum khan PFA Players' Player of the Year-ah thlan a ni.

Zanin dar 11:00-ah City hian Foxes hi an mikhual dawn a, Leicester boss Puel chuan Algerian forward hi a inlan loh tur thu a sawi chiang tawh.