Dheeraj-a'n Europe lam a hawi

FIFA U17 World Cup 2017-a che ṭha tak India goalkeeper Dheeraj Singh Moirangthem chuan Europe lam hawiin a ke a pen a, Ningani zan khan Scottish Premiership club Mortherwell FC-ah trial a nei ṭan.

Kum 17 mi goalkeeper hian Scottish club-ah hian a tlem berah kar thum chhung trial hi a nei dawn a, coach te mit a tlung a nih chuan Scottish Premiership-a parukna ni mek team hi a zawm ang.

Manipur goalkeeper hian awlsam takin contract erawh a ziak thei dawn lo a, professional contract ziak tur hian July 4-a kum 18 a tlin hun a nghah thlen a ngai dawn a ni.

Dheeraj hian season ṭantir lam khan Indian Arrows tan a khel a, December 31 khan a contract neihlai hmang zoin Europe lama trial nei turin a inbuatsaih. Inbuatsaihna a neih chhung hian Kerala Blasters-ah England goalkeeper hlui David James hnuaiah training a nei.

AIFF Elite Academy chhuak goalkeeper Dheeraj hma hian Indian keeper zingah Subrata Paul chuan Danish club FC Vestsjælland tan contract a lo ziak tawh a, Gurpreet Singh Sandhu chuan Norwegian club Stabaek tan khelin Indian player zingah Europa League khel hmasa ber a lo ni tawh.