Tokyo Olympic 2020 : Infiamna khawmpui lian ber an hawng dawn

Harsatna, buaina leh dodalna hrang hrang karah Tokyo Olympic 2020 chu an nei tlang dawn, vawiin tlai dar 4:30 hian National Stadium, Japan-ah a hawnna an nei dawn ta. Mizoram aṭang chuan TV channel Sony network kaltlangin a en theih ang a, online hmanga en duh chuan Sony Liv hmangin a en theih ang.

Tokyo Olympic-ah hian ram hrang hrang 206 aṭangin infiammi 11,000 chuang an pungkhawm a, infiamna peng hrang 33-ah an inel ang - India pawhin infiamna peng hrang 18-a inlan turin infiammi 228 a tir chhuak.

Buaina karah
A tira ruahman dan chuan Tokyo Olympic hi nikum 2020 nipui laia neih tur kha a ni. Mahse, khawvelin tun hma lama a la hmelhriat tam loh coronavirus a leng a, nunphung a buai zo - Olympic pawh ruat lawk hunah neih theih a ni lo.

International Olympic Committee (IOC) leh a thlengtu Japan sorkar thuneitu lamin ṭhulh mai an remti lo a, kum khat atan a hun an sawn tlai. A hming atan erawh 'Tokyo Olympic 2020' ni chhunzawm zel se an ti.

Hripui leng a reh thei mai lo, a thlengtu Japan ram ngei pawhin inkhuahkhirhna an kalpui deuh reng. Media lamin mipui ngaihdan lakna an buatsaih fo a, hengah te hian ngaihdan sawitu a zatve aia tam chuan Olympic neih loh emaw, a hun sawn leh emaw an duh ṭhin.

IOC lamin Olympic hi vawi khat bak sawn an remti lo, dollar tluklehdingawn 15.4 vel zet senna a nih avangin a nghawng a lian a, Japan sorkar pawhin a hnawl ngawt thei lo, mipui tam tak duhdan ngai pawimawh zo loin inelna an thleng tlang.

Stadium ruak
Infiamna khawvel chawk buaitu, kalphung pangngaia kal tir thei lo tu Covid-19 vang bawkin buaina a la zo thei lo. Japan hian invenna (vaccine) la kim tawh leh hri kai lo tih hriat chian bikte tan Olympic hi a hmuna en theih an beisei.

Mahse, khawvel dinhmun thlirin ram dang aṭanga entu kal an remti lo a, tualchhung mi erawhin an en theih tura buatsaih a ni leh phawt. Amaherawhchu, duh leh beisei angin thil a kal thei chuang lo - a tawpah chuan entu awm lo turin thu an ti tlu ta zawk.

Olympic hawnna leh kharna hunah a hmuna entu mipui an awm thei dawn ta lo. Infiammi kal khawm erawh mi sing chuang an tlin tawh sa avangin a hmun boruak chu a nep dawn chuang lo tih a chiang.

A hmuna entu an awm loh avangin TV leh internet kaltlanga entu an pun zual ngei a rinawm. Asia khawmualpuia neih a nih avangin India mite tan chuan Olympic hi zing, tlai leh zan tir lama en nuam tawk vel a tam ṭhin dawn.

Eng nge thleng dawn?
Tokyo Olympic 2020 hawnna hunah hian ennawm en tur a awm dawn. Olympic dang ang bawkin a thlengtu Japan chuan an hnam ziarang lan theihna, an pi leh pute sulhnu leh an ramzia lan theihna an chhuah dawn.

Emperor Naruhito-a'n hawnna thu a sawi dawn, thu tam a sawi dawn lo. Media lamin an tarlan dan chuan a thusawi tur hi thumal 17 vel chauh a ni, an ti! Inlawmna thu sawi a awm bawk ang, chumi hnuah ram hrang hrang aiawha kal ten kawng zawh (parade) an nei ang.

Ram hrang hrang hian luh hmasak dan tur indawt an nei. Olympic bul ṭanna Greek team chu a hmasa berah an rawn lut ang, chumi hnuah chuan raltlan (Refugee Olympic Team) an rawn kal ang, anni hi ram bik nei lo, raltlan hrang hrang awm khawm an ni.

A thlengtu Japan aiin Olympic neih lehna tur pahnih France leh United States an rawn inlan hmasa ang, hetiang hi a vawi khat thlenna tur a ni - a hnu lamah chu Japanese ṭawnga ram hming indawt danin an rawn in zui ang.

Olympic Chhinchhiahna (Symbol)
International Olympic Committee (IOC) dintu Pierre de Coubertin-a'n kum 1913 daih tawh khan Olympic chhinchhiahna (symbol) hi a lo siam tawh a, tun thlengin an la hmang chhunzawm zel. Olympic symbol-ah hian rin bial panga, rawng chi hrang hrang - dum pawl, eng, dum, hring leh sen te in bat kual vekin an awm, a hnung (back ground) chu a var hlang a ni thung a, heng hian awmzia a nei vek.

Rin bial panga te hian khawvel khawmualpui hrang hrang - Europe, Africa, Asia, America leh Oceania te a entir, a hnunga a var hlang hian inelna hmachhawn ram hrang hrangte hnam puanzar ṭheuh chu a entir bawk, thlei bik a nei lo.

Olympic Village
Olympic thlengtu hian infiammite thlen khawmna turin hmun bik an siam ṭhin. A hmasa ber atana an siam chu 'Athens 1906' niin, hetah hi chuan a bik taka in sak ni lo mah se an awmkhawmna hmun hming atan an vuah. Kuminah hian Tokyo khawpui laili a awm Harumi-ah Olympic Village buatsaih a ni a, infiamna khawmpui lian hmachhawn tute thlen nan bik hian chenna in lian tak tak 21 sak thar a ni a, hlawm hrang 5000 zetah ṭhen hran a ni.

Infiammi Olympic hmachhawn turte hi an ram an chhuahsan hmain hri lakah an fihlim em tih endik hmasak vek an ni a, inelna neihna tur hmun an thlen hnuah endik leh an ni bawk - Olympic Village hi chu hri leng lakah pawh fihlim turah an ngai. Mahse, Olympic Village thleng tawh zingah mi pathum chu hri an kai tih hmuhchhuah a ni tawh, a khat tawka endik reng an ni bawk. Nimin tlai thleng kha chuan hmuh chhuah thar an la awm leh rih lo.