NT-a fight neih hun tur a chiang ta

Mizo boxer zinga hriat hlawh bera chhal ngam NT Lalbiakkima chuan August 6 khian title fight a hmachhawn thei dawn ta a, professional boxing a luhchilh hnua a match hnihnaah hian Sandeep Singh nen IBA intercontinental title an inchuh ang.

NT-a chuan, "Fight turin ka inpeih tawh a, chutihrual chuan a awlsam dawn lo tih ka hre bawk. Ka hmachhawn tur Sandeep nen hian game inang tak, rang taka attacking bei ṭhin kan ni a, a hautak dawn," a ti a, mipui tan fight hmuhnawm tak an chhawpchhuah theih a beisei thu Vanglaini a hrilh.

Punjab boxer Sandeep hi Junior leh National Men's boxing champion-ah te pawh medal lo hlawh chhuak tawh a ni a, NT-a tan a awlsam lo ang.

Siaha boxer NT-a hian a professional fight hmasa ber chu December, 2020 khan a lo khel tawh a, round khatna lekah technical knockout hmangin hnehna a chang.

'Zo Keite' tia hminglem an pek boxer hian a match hmasa bera hnehna a chan hnuah title fight-a neih theih dan tur ngaihtuah a ni a, IBA nen inbiakna neih fel a nih hnuah April 17 khan Sandeep nen hian inhnek tura tih a ni.

Mahse, Mumbai khawpuia inhnek tura tih hi Covid-19 hri leng a zual avangin May 7-a Mizorama neih turin tih a ni a, hei pawh a ni puan fel vek a nih hnuah Mizorama Covid-19 hri len avangin ṭhulh a ni.

IBA title hi India a thlenna a rei tawh avangin NT-a contract neihna Marine Pro Boxing Promotions lam hian an inhnek hun tur an ngaichang reng a, August 6 chu tihchian a ni leh ta 'phawt' a ni. Marine Centre, Mumbai-a inhnek tur hi Covid-19 vangin a hmunah entu an awm thei lo ang.

NT-a promoter Devraj Das chuan, "NT-a hian hmabak êng tak a nei a, a tan theihtawp kan chhuah zel ang. IBA title fight zawhah fight a tam thei ang ber a neih a ṭul dawn a, sang tak thlenpui kan tum. Chumi tur erawh chuan a record a tih ṭhat phawt a ngai a, chumi zawhah a aia sang title kan beisei zel ang," tiin Vanglaini a hrilh.

Professional boxing a luhchilh hmaa Indian amateur boxing-a hmabak êng ber pawla ngaih NT-a hian coach Lalmuanpuia leh strengh and conditioning coach Biakzuala (Gte-a) hnuaiah ngawrh takin training a nei mek.

Tuipui boxer Laldingliana chu Mumbai khawpuia inhnekah hian a fight ve dawn bawk a, vawi khat fight-a hmachhawna vawi khat lo chak tawh Vindo Vanteddu nen an inhnek ang. Vimal Punera leh Hans Raj-te chuan IBA Asia title inchuhin co-main event a ni dawn bawk.