Golden Slam awlsam dawn lo
Novak Djokovic-a'n mipa tennis player dangten an la tih theih ngai lo tih a tum, a kalkawng erawh a awlsam dawn lo. Golden Slam ni tur chuan player ṭha tak tak a paltlang a ngai dawn.
Tokyo Olympic tennis khelh dan tur tih fel a ni tawh. Serbian tlangval hian a match hmasa berah Bolivia aiawh a inlan Hugo Dellien a hmachhawn dawn, ani hi world number 139 daih a nih avangin a harsa lo tura ngaih a ni.
World number 1 Djokovic hi a chak tluang zel a nih chuan, quarterfinal-ah world number 7 Andrey Rublev nen an inhmachhawn thei dawn. Player ṭha dang - Alexander Zverev, Stefanos Tsitsipas leh Daniil Medvedev te an inlan ve bawk.
Tennis season kal laiah Djokovic hian Australian Open, French Open leh Wimbledon title a la tawh. Olympic leh US Open a la chhunzawm thei a nih chuan 'Golden Slam' a ni dawn, mipa tennis pleyer dang ten an la tih ve theih ngai loh a ni.
Hmeichhe player zingah erawh ti thei pakhat a awm. Germany legend Steffi Graf-i chuan kum 1988 khan Grand Slam pali bakah Olympic gold medal chu season khat chhungin a lo la kim tawh, tennis player tan chuan sulhnu ropui bik a ni chiang hle.
Djokovic hian tun hmain Olympic hi a lo khel tawh ṭhin, singles huangah gold medal a la dawng ngai lo. Beijing 2008 khan a thlen san ber a ni a, an ram tan bronze medal a hlawh chhuak - kuminah hian a thlen chin kan hre thuai dawn.
Grand Slam lak hnem lamah chuan Djokovic hian Roger Federer leh Rafael Nadal (20 titles) te a nihrual tawh. Federer leh Nadal te hian Golden Slam atan hun an nei tawh loa ngaih a ni - Serbian tlangval erawhin a hun ṭha neih chhawr ṭangkai ngei a tum ang.
Tokyo Olympic-ah hian Andy Murray pawh a inlan dawn. Great Britain tlangval hian London 2012 leh Rio 2016 khan an ram tan gold medal a lo hlawh chhuak tawh, kuminah erawh hliam dam hlim a nih avangin gold medal dawng tura beisei a ni phak lo.
Hmeichhe inelna lamah Naomi Osaka chu mipui mit fukna a ni dawn. Japanese star hian tun hnaiah rilru lam harsatna a nei a, inelna lian French Open leh Wimbledon aṭangin a inhnukdawk hial - an ramah hian gold medal lak ngei a tum dawn.