East Bengal an buai - ISL an khel dawn em?

Indian club langsar ber pawl East Bengal buainain ziaawm lam a pan thei lo a, Nilaini chawhnu lam khan Red and Golds fans engemawzat chu club office pawnah an pungkhawm.

Fans pungkhawmten club official-te bang tura an duhna thu an aupui a, police-in tharum hmangin fans an hnawt thung - hei tak hian fans lungawi lo sa a tih lungawi loh belh a, buaina lian zawk a chhuak.

Police thuchhuahin an tarldan danin fans 15 vel chu man an ni a, engemaw zatin hliam an tuar bawk - pathum chu damdawi inah an lut hiala sawi a ni.

Hetiang boruak karah hian Indian football-a fan club hrang hrangin East Bengal thuneitute an demna thu an au chhuahpui a, Kolkata club ṭantute hian an duh an hmu a nih loh chuan buaina lian zawk an siam leh a nih pawhin a mak lo ang.

Buaina chu
June 2020-a Quess Corp nen an thawhhona an tihtawp hnuin East Bengal hian Shree Cement nen inremna an nei a, Indian Super League khel turin ruahmanna an kalpui zui.

West Bengal chief minister Mamata Banerjee chu inremna awm theih nana thawhhlawk a ni a, an inremna ang hian Shree Cement East Bengal Foundation tih chu din a ni a, cement hmanga sumdawng lian Shree lam hian 76% share neiin East Bengal-in 24% share an nei thung.

Pawl pahnih inremna hi inremna lailawk anga kalpui a ni a, club sporting rights te, a bungrua leh thil dang zawng zawng chu Shree Cement East Bengal Foundation thuneihna hnuaiah dah nghal vek a ni.

Mahse, he inremna hi inremna tak tak a nih loh avangin pawl pahnih hian contract thar ziak turin tun hnaiah hma an la a, mahse, pawl pahnih an inrem thei tlat lo.

A chhan
Kar hmasa khan East Bengal executive committee chu an ṭhukhawm a, Shree Cement nena inremna hi pawm loh an rel - a chhan nia an sawi chu nikum lama an inremna leh tuna an inremna tura chhawpchhuah inang lo chu a ni.

East Bengal lama a hmaa an inremna leh tuna contract thar inan loh thu an sawi lai hian Shree Cement lam erawhin a danglamna a awm loh thu an sawi thung a, hei vang hian fans an lawm lo.

Shree Cement thuneitu zinga mi, a hming tarlan loh chuan fan-te chunga East Bengal thuneitute chet dan chu a dem thu a sawi a, an pawl chu an dinna ngaiah an din reng thu a sawi bawk.

Hei mai a ni lo - East Bengal thuneitute chu inremna tura an chhawpchhuahah a hma mi nena danglamna a awm a nih chuan ziaka chiang taka tarlanga an hnena thlen turin a ti.

A tawk zozai!
East Bengal-in July 2018-a Quess Corp nena inremna an neih khan fan-ten beiseina sang tak an nei a, player pawh langsar tak tak hlir an lalut - Costa Rica tana World Cup khel zo hlim Jhonny Acosta leh Mexico international hlui Enrique Esqueda te thlengin an lalut.

Mahse, Quess leh East Bengal hi an thawk ho rei hleithei lo a, club chhungkuaah buaina neuh neuh an nei reng - kum hnih an thawk ho hman awrh tihin Quess chuan June thla khan Kolkata club nena thawhdunna an titawp.

Fan-ten hruaitute an dem luai luai laiin football ngainatu chief minister Mamata a lo lang a, dollar tluklehdingawn hnih chuang hau-sakna neitu Shree Cement chu East Bengal tana an sum theh chhuak turin a hminsak.

Mahse, Quess thawhpui thei lotu East Bengal thuneituten Shree Cement pawh an thawhpui hleithei lo a, fans tam zawkin hei hi an hrethiam thei lo a, club chungah an lungawi lohna an lantir ta a ni.

Fans an phir
Nilainia fans lawm lo pungkhawm zingah hian East Bengal thuneitu lam thlawpa kalkhawm an awm ve bawk a, anni hian buaina siam loa kalkhawm, official duh lo lam lakah hian buaina an siam nia sawi a ni.

Official lam ṭantu fan-te hi sum pek an ni ang hiala sawi a awm bawk a, hei hian fans tam tak a ti lungawi lo lehzual. Hetiang boruak karah hian Indian Super League fan club tam tak chuan East Bengal fan-te thlawpna thu an aupui nghal a, Indian football fan club-a ngaih pawimawh hlawh tak Blue Pilgrims chu thawm nei ring pawlah an ṭang.

ISL club Kerala Blasters chuan, "Fan-te tel lo chuan football hi engmah a ni lo a, fans zawng zawngin an ngaihdan an sawi a thiang a, chu ngaihdan chu kan ngaithla bawk tur a ni," tiin thuchhuah an siam.

IPL club Kolkata Knight Riders (KKR) director hlui leh FIFA U-17 World Cup India-in a thlen ṭuma project director lo ni tawh Joy Bhattacharjya chuan, "Ka team ṭan hmasak ber chu East Bengal a ni a, tun hnaia club chunga thil thleng hi thudik tih bawrhbanna leh an fans tam tak tana chhiatna ang mai a ni," tiin club thuneitute a lo dem ve bawk.

AIFF inrawlh dawn lo
East Bengal leh Shree Cement an buai a, a tuartu ber chu club ṭantute an ni. Mahse, Indian football-a thuneitu sang ber All India Football Federation (AIFF) chuan buainaah hian an inrawlh loh tur thu an sawi a, West Bengal-a football thuneitu Indian Football Association (IFA) pawhin inrawlh a tum lo.

AIFF generel secretary Kushal Das chuan, "Club leh fans inkarah buaina a chhuak tih ka lo hria a, a pawi ka ti takzet. Mahse, AIFF leh IFA tan inrawlhna tur erawh a awm lo. Club leh sum thawhtuten inremna ziahsa an nei a, midang lo inrawlh vena tur a awm lo," a ti.

Kushal Das-a sawi dan chuan India rama club football inelna sang ber Indian Super League chu November 19 khian Goa-ah neih ṭan a ni dawn a, Das chuan, "August 1-ah transfer bazar khar a ni tawh dawn a, an buaina hi an chingfel vat a nih loh chuan an tan ISL hmachhawn a harsa ang," tiin a sawi.

Shree Cement nena inhnaih tak pakhat chuan, "Season hmasa khan Shree Cement hian vaibelchhe 54 vel an seng a, tun season-ah pawh sum tam tak seng turin an inpeih. Mahse, chumi tur chuan inrem phawt a ngai," a ti a, East Bengal thuneitu lam chu buaina neiah a puh.