Mizo infiammi chhuanawm leh Indian olympic medalist-te

C. Lalremsanga
Mizo zinga Olympian hmasa ber C. Lalremsanga hi February 29, 1976 khan East Lungdar-ah a piang a, Mizopa Sairawkherh aṭanga bul ṭan kha Barcelona 1992-ah khan kum 15 leh thla 7 mi lek niin India aiawhin archery (thal kah) ah a tel. Remsanga hi Atlanta 1996-ah a tel leh a, India hmarchhak aṭanga Olympic-a ṭum hnih inlan thei hmasa ber a ni.

Archery bikah India-in Olympic-a quarter final a thlen hmasak ṭumin Remsanga hi a pawimawh a, archery tana a sulhnu ropui tak avangin August 29, 2019 khan Dhyanchand Award a dawng. Mizo chauh ni loin India hmarchhak aṭanga dawng hmasa ber a ni bawk.

Kum 15 leh thla 7 mi ka nihin Barcelona Olympic-ah khan ka tel a, Olympic hlutna ka la man thiam tak tak lo. Atlanta-a ka kal ṭum kha chuan a hlut dante ka hrethiam tawh a, tun hnu thleng hian ka ngai hlu hle. Olympic hian ka lung min len a, he inelna hunlai hi chuan thil dang ka ti hlei thei ṭhin lo, ka en ni leng ṭhak zel a ni ber. Mizote hian Olympic hlutzia hi hrethiam ila, inelnaa tel phak hrim hrim infiammi tan chuan hlawhtlinna a tling pha. Tokyo 2020-ah pawh Lalremsiami Hmar a tel dawn a, ṭha tak leh nuam ti taka khel turin duhsakna ka hlan a ni. - C Lalremsanga Thal kap thiam (Archer)

Lalruatfeli Hnialum
Rio Olympic 2016-ah khan South Lungleng nula Lalruatfeli Hnialum chu India hmeichhe hockey team-ah (standby) a lo tel tawh. India team hian group stage an paltlang lo a, hmeichhe inelnaah Great Britain-in gold medal an la a, Netherlands (silver) leh Germany (bronze) ten an la ve bawk. Tokyo 2020-ah Mizo nula Lalremsiami Hmar a tel ve leh a, result ṭha zawk neih an tum dawn a ni.