IOC-in Muaythai Game a pawmpui ta

International Olympic Committee (IOC), Tokyo-a ṭhukhawm chuan tun hnai khan Muaythai Game chu full recognition a pe a, muaythai rual hian game dang panga a pawmpui bawk.

Kum 2016 khan Muaythai hi Lausane, Swit-zerland-a IOC executive board ṭhukhawm chuan Olympic sport atana hual lawkna provisional recognition a lo pe tawh a, kum nga hnuah full recognition a pe.

Khawvel pum huapa Muaythai thuneitu sang International Federation of Muaythai Associations (IFMA) hnenah IOC chuan an pawmpuina an thawn a, khawvel pum huapa Muaythai game kheltu leh ngainatu tan ni chinchhiah tlak tak a ni.

Hemi chungchangah hian India rama Muaythai thuneitu sang United Muaythai Association of India (UMAI) chuan Nilaini (July 21) tlai khan State tin aiawhte nen Webminar (Cloud HD Video Meeting) meeting ko nghalin IOC pawmpuina hian India ram sports-ah Muaythai game-in nasa leh zuala hma a sawn phah ngei an beisei thute sawiin Mizoram aṭang pawhin meeting-ah hian an tel ve bawk.

United Muaythai Association of India chuan August 2-14, 2021 chhungin National Virtual Championship a buatsaih dawn a, hemi tana inbuatsaihna leh selection ni nghal State Virtual championship vawi hnihna neih tumin Muaythai Association of Mizoram pawh a inbuatsaih chho mek a ni.