Ramos thlak tur ka ni lo - Alaba

Real Madrid defender thar David Alaba chuan club captain hlui Sergio Ramos hak ṭhin number 4 ha dawn mah se Ramos thlaktu tur a nih loh thu a sawi.

Kum 29 mi Alaba hian Bayern Munich-a a contract a hman zawh hnuin free transfer-in Real hi a zawm a, Real legend Ramos chuan kum 16 zet Madrid khawpuia hun a hman hnuin Paris St-Germain a zawm ve thung.

Alaba chuan, "Ramos-a'n he club-ah hian hun rei tak hmangin jersey number 4 a ha ṭhin a, hruaitu ropui tak a ni zui tih chu kan hre vek. Mahse, he number hi ka duh reng vanga thlang ka ni lo.

"Club nen kan inbia a, number 4 chiah a awl rih thu min hrilh a, player dang be chunga jersey number inthleng dil kual vel kha ka duh lo a ni. Number 4 ka ha thei hi ka lawm a, ka tan chuan chawimawina ropui tak a nih avangin hna pawh ṭha taka thawh ka tum.

"Mahse, he hmunah hian midang nena inkhaikhin emaw midang hmun ruak luah tur emawa lo kal ka ni lo a, he hmunah hian David Alaba ni mai turin ka lo kal zawk a ni," a ti.

Spain tana vawi 180 inlan thei Ramos-a'n Real tan league nomawi panga chawiin Champions League-ah vawi li a champion a, Alaba hian Bayern tan Bundesliga title vawi 10 lain, Champions League (2) leh German Cup (6) ah a champion bawk.

Real-a kum nga chhung khel tura contract ziaktu hian Ramos-a hmun ruak a hnawh khat zo ang em, tih chu chhanin a awm thuai ang.