Norwich-ah Farke a cham dawn

Premier League kai thar Norwich City chuan an coach Daniel Farke chhuahtir tumna an la nei lo a, kum li dang an hnena cham chhunzawm turin contract thar an ziahpui.

Kum 44 mi Farke hian Borussia Dortmund reserve team aṭangin May 2017 khan Norwich hi a zawm a, a season hmasa berah Championship-ah 14-na a nihpui thei hram.

Mahse, a season hnihnaah erawh champion nihpuiin Premier League a hruai thleng a, season khat hnuah tla leh mah se tun season-ah pakhatna nihpui lehin English top flight-ah an kir lehnghal.

German coach chuan, "Ka hlimin ka lawm takzet a, heti taka min rin leh thlawp avang hian lawmthu ka sawi thiam lo zawk a ni," a ti.

Farke bakah hian assistant manager Eddie Riemer, head of performance Chris Domogalla leh first team coach Christopher John te chuan kum li dang cham turin contract thar an ziak ve bawk.

Canaries (Norwich sawina) sporting director Stuart Webber chuan, "Kan club tan chanchin lawmawm a ni," tiin Farke leh a coaching staff te an chelh thei chu a lawm thu a sawi.

Norwich City hian August 14 zanah Liverpool mikhualin tun season Premier League-a an zinkawng an zawh ṭan ang.