Everton-in Gray an hnaih

Premier League club Everton-in transfer bazar-ah player an melh chhunzawm zel a, Bayer Leverkusen winger Demarai Gray chu an lalut hnai - he thuziak i chhiar meuh chuan an in lalut fel tawh hial mai thei.

Kum 25 mi winger hi English mi a nih avangin English football-ah mi thar a ni lo. Birmingham City-ah a career ṭanin season thum chhung Championship-ah a khel a, kum 2015 khan Leicester City a zawm.

Leicester-in league nomawi an chawi kumah khan league match 12 a khel ve a, a hnu season aṭangin hmun pawimawh a chang chho. Season hmasa khan Foxes tan a inlan phak meuh lo a, January khan Bayer Leverkusen a zawm.

German club-ah hian league match 10 khelin goal khat a khung a, assist vawi hnih a nei - Everton hian an duh chuan pound maktaduai 1.5 velin an lei thei tura ngaih a ni.

Everton coach Rafael Benitez-a‘n free transfer-in Crystal Palace winger Andros Townsend leh Bournemouth goalkeeper Asmir Begovic chu a lo lalut tawh bawk.

British Iranian sumdawng hausa Farhad Moshiri-a‘n kum 2016-a Everton a lei hnuah English club langsar pawla siam a tum a, player lei nan ringawt pound maktaduai 500 chuang a seng tawh.

Mahse, Everton hi an che fuh hleithei rih lo a, Liverpool boss hlui Benitez hian sum seng tam lo zawnga team din thar dan a ngaihtuah niin a lang.

Hetihlai hian Everton chuan Brazilian winger Bernard an chhuahtir dawn nia sawi a ni a, United Arab Emirates club Sharjah FC nen sawizawm niin Russia leh Greece aṭangin rimtu a nei bawk.

Everton hi USA-ah pre season khel turin an thang mek a, Florida Cup an khel ang - Colombian club Millonarios FC nen Thawhṭanni zing dar 6:00-ah an inkhel dawn a ni.

Merseyside club hi midfielder Fabian Delph tel loin an zin chhuak thung a, kum 31 mi midfielder hian Covid-19 kai a lo hnaih avangin a inkhunghrang mek.