Brentford an bazar zel

Kum 74 hnua top flight league khel tur Brentford chuan Norway centre back Kristoffer Ajer chu Celtic aṭangin an lalut a, kum nga chhung atan contract an ziahpui.

Kum 23 mi centre back hi a man zat puanzar ni lo mah se pound maktaduai 13.5 man bawr vela ngaih a ni a, season li chhung zet Celtic-ah regular taka a khelh phak avangin a chhe lo ang tih a chiang.

Bees (Brentford sawina) boss Thomas Frank chuan, "Ajer hi defender tur kan zawn ruala kan duhthlan hmasa ber a ni a, Premier League hmachhawn nghal turin a inpeih a ni," a ti.

Norway tana vawi 23 inlan tawh defender hian June 2016 khan Celtic hi a bul ṭanna, an ram club Start aṭangin a zawm a, Kilmarnock-ah loan-in kaltir zui a ni.

Kum 2017 khan Celtic tan a khel ṭan a, inelna hrang hrangah match 176 a khelhsak hman - 2018-19 season khan PFA Scotland Team of the Year-ah a lang a, league nomawi vawi thum a chawi bakah Scottish Cup (3) leh Scottish League Cup (3) ah a champion bawk.

Celtic chuan Ajer an chân hnuah hian Sweden centre back Carl Starfelt chu Rubin Kazan aṭanga an lak thu an puang ve zui a, kum li atana contract an ziahpui defender hi pound maktaduai 4.29-in an lei.

Brentford hian nipui transfer-ah Nigerian midfielder Frank Onyeka chu FC Midtjylland aṭangin an lalut tawh bawk a, Ajer hi an player lakluh pahnihna a ni.