Olympic football-ah Brazil-in Germany an hneh

Rio 2016 final rematch-ah Brazil-in Germany 4-2 in an hneh a, Saitama-a inkhelah goal ruk a luh avangin hun tawp thlengin inkhel a hmuhnawm. Nizan Olympic inkhelah hian Everton forward Richarlison-a'n minute 30 chhungin hattrick a siam a, first half-ah 3-0 a ni.

Germany tan Nadiem Amiri-a'n goal khung ve mah se captain Maximilian Arnold hnawhchhuah a nih avangin player 10-a an khelh a ṭul phah. Germany substitute Ragnar Ache-a'n siphurh a sut ṭhen a, minute ruk la awmin 3-2 ni mah se Brazil substitute Paulinho-a'n injury time-ah chak nemnghehna goal a khung.

Mipa Olympic football hi July 25, Pathianniah chhunzawm a ni dawn. Tlai dar 2:00-ah group D-a point thum hmu tawh pahnih Brazil leh Ivory Coast te an inkhel ang a, dar 5:00-ah point la hmu lo pahnih Saudi Arabia leh Germany te an inkhel ang.

Tu te nge inlan?
Brazil-in gold medal lak ngei tumin player an thlang a, kum 38 mi Dani Alves a ni a, over age player dang hi kum 31 mi keeper Santos leh kum 28 mi Diego Carlos te an ni a, an pathum hian tlarhnunga khel ṭhin vek an ni.

Defence-a pahnih dang hi left back Guilherme Arana leh centre back Nino te an te an ni a, Brazil club tan an khel ve ve. Midfield-ah Douglas Luiz (Aston Villa), Bruno Guimarães (Lyon), Matheus Henrique (Gremio) leh Claudinho (Red Bull Bragantino) te an awm.

Tlarhmaah Matheus Cunha a awm a, Hertha BSC forward hi Richarlison-a'n a thlawp. Andre Jardine kaihhruai Brazil Under 23 hi ṭha viau mah se an senior team nen chuan an kar a la hla a, chutihrualin Germany-in player langsar an ko lo.

Over age player pathum te chu midfielder pahnih Maximilian Arnold leh Nadiem Amiri bakah forward Max Kruse te an ni a, an pathum kum chawhrual hi kum 28 a ni a, ram tana an khelh zat belhkhawm pawh vawi 20 chauh a ni.

Brazil hun
Ṭan phat aṭangin Brazil-in inkhel an thunun a, goal chance an neih mawlh mawlh avangin keeper Florian Muller-a'n hna a ngah hle. Minute kuana lekah Matheus Henrique through ball fing chu Richarlison-a'n um lutin a ball pet vawi khatna hi keeper Muller-a'n dang mah se Everton forward hian keeper save per chu goal-ah a chantir tho.

German tlarhnung tihsual vangin Richarlison-a'n chance ṭha dang a nei a, keeper Muller chauh a hmachhawn hnuah a ti goal lo. Minute 22-naah vei lam aṭanga Bruno cross chu Richarlison-a'n chiang zetin a tauh goal a, Everton forward hian minute riat hnuah mawi zetin a hlai goal. Richarlison-a'n hattrick siam turin darkar chanve chauh a mamawh.

Germany mangchhia belhchhah turin first half injury time-ah handball vangin penalty an chawi a, Matheus Cunha rawn pen chhuakin keeper Muller-a'n a dansak hlauh. Minute 45 chhungin Brazil an chungnung hle.

Brazil tho
First half-ah Brazil-in inhel an thunun a, second half-ah pawh Selecao hi team ṭha zawk an la ni tho. Amaherawhchu Nadiem Amiri-a'n minute 56-naah Germany tan goal a khung a, beiseina an neih phah. Chutihrualin minute 61-naah captain Arnold-a'n yellow card vawi hnihna a nih a hmuh avangin Germany-in player 10-in an khelh a ṭul phah.

Goal hmaah Brazil an la hlauhawm zawk a, amaherawhchu Germany defender Ache-a'n minute 84-naah rawn tauh goal-in siphurh a sut ṭhen. Stefan Kuntz-a hoten siphurh sut turin goal khat dang an mamawh a, Brazil-in goal chance an la ngah zawk. Hun tawp dawn hnaihah Matheus Cunha-a'n chance ṭha a hlah leh mah se Selecao substitute Paulinho-a'n injury time-ah chak nemnghehna goal a khung.