Argentina-in Australia hneh lo

Copa America champion Argentina chuan nimin tlai khan Tokyo Olympic-ah inelna an khel ṭan a, an match hmasa berah La Albiceleste hi Australia lakah 2-0 in an tlawm.

Group C inkhelah Australia tan forward Lachlan Wales chuan minute 14-na lekah goal hmahruai a khung. South American team lamin sut tum mah se an thei lo, chawlhlawk hma chiahin an defender Francisco Ortega chu hnawhchhuah a ni zui.

Player tam zawk Australia pawhin an tamna an chhawr ṭangkai mai lo, hun tawp hma minute 10 chauh awm tawhah bench aṭanga lut forward Marco Tilio hmanga goal hnihna khungin chak an nemnghet.

Argentina hian July 25, Pathianniah an group match pahnihna atan Egypt an hmachhawn leh ang. Australia hian Spain an hmachhawn thung dawn a ni.

Argentina hian 2004 khan a vawi khat nan Olympic mipa football-ah gold medal an la. 2008 Beijing Olympic kha Lionel Messi, Angel di Maria leh Sergio Aguero te rawlthar nih lai niin, an ram tan hian gold medal an lo la tawh bawk.